Almatyda Everestti baǵyndyrǵan alpınısterdi saltanatty túrde qarsy aldy
ALMATY. KAZINFORM – Ǵalamshardyń eń bıik shyńy Everest shyńyna (8848 m) shyqqan qazaqstandyq alpınıster Maqsut Jumaev, Anar Býrasheva jáne Álmir Qymbatbaıuly elge oraldy.
Ekspedıtsııanyń maqsaty – Qazaqstannyń memlekettik týyn álemniń eń bıik shyńynda kóterý.
Almaty áýejaıyna ekspedıtsııa qatysýshylary – Everestke shyqqan tarıhtaǵy tuńǵysh qazaq qyzy Anar Býrasheva men onyń jetekshisi, ǵalamshardaǵy 14 segiz myńdyqtyń barlyǵyn baǵyndyrǵan aty ańyzǵa aınalǵan qazaq alpınısti Maqsut Jumaevty, sondaı-aq Álmir Qymbatbaıulyn qarsy alýǵa kelýshiler kóp boldy.
Qazaqstan Respýblıkasy Qorǵanys mınıstrliginiń ujymy alpınısterge komandanyń Gımalaıda bolǵan ýaqytynda, ásirese kóterilý kezinde, ekstremaldy jáne kúrdeli aýa raıynda kórsetken batyldyǵy men batyrlyǵy úshin alǵys bildirdi.
«Osy ýaqyt ishinde bizge jyly lebizderi men tilekterin joldaǵan otandastarymyzǵa alǵys aıtamyn. Anar Býrashevaǵa Everestke shyǵýǵa kómektesý meniń armanym edi. Sol maqsatqa jetýge kómektesken adamdarǵa rahmet», - dedi Maqsut Jumaev.
Óz kezeginde Anar Býrasheva osy ýaqyt ishinde onyń basty motıvatory otbasy bolǵanyn atap ótti.
«Otbasymnyń sýretteri kúrteshemniń júrek tusyndaǵy qaltada boldy. Taýǵa shyqpas buryn biz «Pýdja» rásimin jasadyq jáne taýdan kóterilýge ruqsat surap, aman-esen orýlýymyzdy tiledik. Anamnyń duǵasy meni aman saqtap qalǵanyn da bilemin. Bizdiń ekspedıtsııamyzǵa qyzyǵýshylyq tanytyp, qoldaý kórsetken barlyq otandastarymyzǵa rahmet», - dedi Anar Býrasheva.
Buǵan deıin qazaq qyzy tuńǵysh ret Everest shyńyna shyqqany týraly jazǵan bolatynbyz.
Sondaı-aq qazaqstandyq alpınıster 6186 metr bıiktikte jattyǵý júrgizip jatqany týraly jazǵan edik.
