Almatyda esirtkini jasyryn taratqan 29 jastaǵy kúdikti ustaldy

ALMATY. KAZINFORM – Almaty polıtsııa departamentiniń esirtki qylmysyna qarsy is-qımyl basqarmasynyń qyzmetkerleri Áýezov aýdandyq polıtsııa basqarmasyna qarasty polıtsııa bóliminiń qyzmetkerlerimen birlese otyryp, zańsyz esirtki aınalymyna qatysy bar taǵy bir kúdiktini anyqtap, ustady. 

Jedel-izdestirý is-sharalary barysynda 29 jastaǵy qala turǵyny qolǵa tústi, tintý kezinde odan 25 orama tárkilendi. Sot-hımııalyq saraptama qorytyndysyna sáıkes, alynǵan zat sıntetıkalyq esirtki – mefedron bolyp shyqty.

Tergeý barysynda kúdiktiniń esirtkini jasyryn jolmen taratýmen aınalysqany anyqtaldy. Onyń aıtýynsha, zańsyz iske ınternet arqyly tartylǵan, al «qyzmeti» úshin aqy onlaın-aýdarymdar arqyly tólenip otyrǵan. 

Atalǵan derek boıynsha qylmystyq is qozǵalyp, kúdikti ýaqytsha ustaý ızolıatoryna qamaldy. Qazirgi ýaqytta polıtseıler qylmystyq tizbektiń uıymdastyrýshylaryn jáne ózge de qatysy bar tulǵalardy anyqtaýǵa baǵyttalǵan jedel-izdestirý sharalaryn jalǵastyryp jatyr.

– Esirtki saýdasymen aınalysatyn, sonyń ishinde ınternet arqyly taratýǵa qatysy bar tulǵalardy anyqtaý jáne jolyn kesý jumystary júıeli túrde júrgizilip jatyr. Biz tek oryndaýshylardy emes, qylmystyq shemalardy uıymdastyrýshylardy da áshkereleýge basymdyq berip otyrmyz. Árbir osyndaı fakt erekshe baqylaýda, - dedi Almaty polıtsııa departamenti esirtki qylmysyna qarsy is-qımyl basqarmasynyń bastyǵy Murat Jumabaev.

Eske salaıyq, buǵan deıin Almatyda sheteldik azamattan birneshe oram esirtki tabylǵanyn jazǵanbyz.