Almatyda esirtki satqan uıymdasqan qylmystyq top músheleri sottaldy
ALMATY. KAZINFORM – Almatyda esirtki satqan uıymdasqan qylmystyq top músheleri uzaq merzimge bas bostandyǵynan aıyryldy.
Almaty polıtsııasynyń qyzmetkerleri qalalyq prokýratýra «Esirtki qylmysyna qarsy kúres» jobasy aıasynda jáne ІІM esirtki qylmysyna qarsy is-qımyl departamenti, QR Qarjylyq monıtorıng agenttigi mamandarynyń kómegimen byltyr turaqty esirtki jelisin joıǵan bolatyn.
Marıhýanany jetkizý men satýdy bes adam uıymdastyrǵan. Atap aıtar bolsaq, azamattyq nekedegi erli-zaıypty, olardyń dosy, jasyryn qoıyp ketýshi jáne kýrer. Jedel tergeý sharalary barysynda anyqtalǵandaı, jas jup qylmystyq protseske jetekshilik etken. Olar uıymdastyrýshy jáne úılestirýshi rólin atqardy. «Taýardy» jasyryn qoıýshylardyń mindetteri eki dos arasynda bólingen. Al kýrer bolyp top músheleriniń bireýi júrdi.
«Messendjer arqyly esirtkini baılanyssyz ádispen sata bastaǵan esirtki saýdagerleriniń qylmystyq áreketteri toqtatyldy. Kúdiktiler Ispanııa men AQSh-tan poshta arqyly esirtki sálemdemelerin alǵany anyqtaldy. Shóp úshin tólem tutynýshylardan elektrondy tólem júıesi arqyly alyndy. Qarajatty alý ekinshi deńgeıli bankter arqyly júzege asyryldy. Sol kezde kúdiktilerdiń qylmystyq áreketteri resmı túrde qujattalyp, kúdiktilerdiń turǵylyqty jeri boıynsha ruqsat etilgen tintýler júrgizildi», – deıdi Almaty qalasy PD esirtki qylmysyna qarsy kúres basqarmasynyń bastyǵy Murat Jumabaı.
Polıtsııa ókili málim etkendeı, qylmystyq top músheleriniń kinási sotta dáleldenip, olar uzaq jylǵa bas bostandyqtarynan aıyryldy.
«Almaty qalasynyń qylmystyq ister jónindegi mamandandyrylǵan aýdanaralyq sotynyń qaýlysymen uıymdasqan qylmystyq topty uıymdastyrýshy esirtki quraldaryn zańsyz óndirý, saqtaý, ótkizý, uıymdasqan top qurý jáne oǵan jetekshilik etý, úgit-nasıhat jasaǵany jáne esirtki zattaryn zańsyz jarnamalaǵany úshin kináli dep tanylyp, 17 jylǵa bas bostandyǵynan aıyryldy. Qylmystyq toptyń qalǵan músheleri, onyń ishinde 35 jastaǵy áıel, árqaısysy 15,6 jylǵa sottaldy», - deıdi ol.
