Almatyda «Ermensaı» sý jınaǵyshy salynady
ALMATY. KAZINFORM – Almatynyń 25 myń turǵynyn aýyz sýmen qamtamasyz etý úshin sý jınaǵysh salynady.
Ákimdikten málim etkendeı, Erbolat Dosaevtyń tapsyrmasymen bıyl maýsym aıynda Bostandyq aýdanyna qarasty Ermensaı shaǵyn aýdanynda «Ermensaı» sý jınaǵyshyn salý boıynsha aýqymdy jobanyń qurylysy bastalady.
– Jańa nysan táýligine 9 myń tekshe metr sý jınaıdy. Joba aıasynda taratý jelileriniń qurylysy da kózdelgen. Bul 2026 jyldyń sońyna deıin Ermensaı jáne Nurlytaý shaǵyn aýdandarynyń 25 myńnan astam turǵynyn sapaly ortalyqtandyrylǵan aýyz sýmen qamtamasyz etýge múmkindik beredi, osylaısha bul aımaqtaǵy kóp jyldan bergi sý tapshylyǵy máselesi sheshiledi,– dep habarlady Energetıka jáne sýmen jabdyqtaý basqarmasy .
Negizi Bostandyq aýdanynyń ońtústik bóligi, sonyń ishinde Ermensaı, «Almaty Sý» memlekettik kásipornynyń qyzmet kórsetý aımaǵyna kirmegen.
Sýmen jabdyqtaýmen jeke kompanııalar – «Vodsnab» JShS (burynǵy «Orhan»), «Ermensaıvodgaz» JShS jáne «Baýr LTD» JShS aınalysyp kelgen. Alaıda turǵyndar bul uıymdardyń qyzmet sapasynyń tómendigi men tarıfterdiń joǵary bolýyna baılanysty uzaq jyl boıy shaǵymdanyp keledi.
Qazir «Vodsnab» JShS-pen sot protsesteri jalǵasyp jatqanymen, ákimdik jaǵdaıdy túbegeıli jaqsartý jáne sot sheshimderin kútpeı-aq turǵyndardy úzdiksiz sýmen qamtamasyz etý úshin naqty basqarýshylyq sheshim qabyldady.
Jobanyń negizgi kezeńderiniń biri – ál-Farabı dańǵylynan Araıly kóshesiniń boıymen ótetin jańa magıstraldy reversıvti sý qubyrynyń qurylysy boldy. Qubyr tartý jumystary aıaqtalǵannan keıin Bostandyq aýdany ákiminiń apparaty taratý jelilerin salady. Bul kóshe boıynda ornalasqan turǵyn úıler men jeke sektordy ortalyqtandyrylǵan sýmen jabdyqtaýǵa jyldam qosýǵa múmkindik beredi.
– Keleshekte bul magıstraldy sý qubyry jobalanǵan sý daıyndaý stantsııasymen qosylady. Mundaı ınjenerlik sheshim Bostandyq aýdanynyń ońtústik bóligindegi sýmen jabdyqtaý júıesiniń senimdiligi men turaqtylyǵyn edáýir arttyrady ári qala ınfraqurylymynyń turaqty damýyna quqyqtyq jáne tehnıkalyq negiz qalyptastyrady, – dep atap ótti basqarmadan.
Osyǵan deıin bıyl «Aqsaı» sý jınaǵyshtyń qurylysy aıaqtalatyny týraly jazǵanbyz.