Almatyda eresekter arasynda taekvondodan Qazaqstan kýbogy ótedi

ASTANA. KAZINFORM - Almatyda eresekter arasynda taekvondodan (WT) Qazaqstan kýbogynyń ekinshi kezeńi ótedi.

Kýbokqa barlyǵy 200-den astam daıang sheberi qatysady dep josparlanǵan. Taekvondoshylar Almaty qalasyndaǵy «ADD» sport kesheninde 10 salmaq boıynsha ózara myqtyny anyqtaıdy.

Jarystyń alǵashqy kúni, 2 shildede erler arasynda 58, 80 kelide, áıelderde 49, 67, 67 keliden joǵary salmaqta júldeler sarapqa salynady. Al 3 shildede erler 63, 68, 80, áıelder 53, 57 keli salmaqta synǵa túsedi.

Eske salsaq, budan buryn taekvondodan Qazaqstan ulttyq quramasy AQSh pen Aýstrııada ótken básekelerde 2 altyn, 2 kúmis, 4 qola medal jeńip aldy. 

Aýstrııanyń Insbrýk qalasynda ótken Austrian Open týrnırinde Azıza Qarajanova (53 keli) men Beıbarys Qabylan (87 keliden joǵary) chempıon atansa, Aıdana Súndetbaı (53 keli) kúmis, Nurqanat Qojahmet (87 keli), Mergen Ǵanıev (80 keli) qola medalǵa qol jetkizdi.

Al AQSh-tyń Sharlott qalasynda bolǵan Gran-prı týrnırinde qorjynǵa bir kúmis, eki qola júlde tústi. Atap aıtqanda, Nodıra Ahmedova (49 keli) ekinshi oryn alsa, Tamerlan Tileýles (58 keli), Batyrhan Tóleýǵalı (80 keli) úzdik úshtikten kórindi.