Almatyda ekologııaǵa zııan keltiretin kólikterdi qalaı anyqtaıdy
ALMATY. KAZINFORM — Almatyda ekologııa jáne qorshaǵan orta basqarmasy, qalalyq polıtsııa departamenti, mamandandyrylǵan tabıǵat qorǵaý prokýratýrasy men «Eco Almaty» JShS, «Renessans+» JShS ókilderi birlesip kólikten shyǵatyn ýly gaz ben tútinniń deńgeıin ólsheý boıynsha reıd ótkizip jatyr. Reıdke jyljymaly ekologııalyq zerthana men úsh jyljymaly ekologııalyq beket tartylǵan. Atalmysh sharaǵa Kazinform tilshisi de qatysyp, jumyspen tanysyp qaıtty.
Atalmysh reıd sáýir aıynyń basynan 20 sáýirge deıingi aralyqty qamtydy.
Sharanyń maqsaty — Almaty ekologııasyn sál de bolsa jaqsartý.
Almaty qalalyq ekologııa jáne qorshaǵan orta basqarmasynyń ekojúıeni monıtorıngileý bóliminiń basshysy Rahym Asqarovtyń atýynsha, Almatyda búgingi kúni jıyny 19 ekobeket jumys istep tur.
«Olardan kóptegen avtokólikter kúndelikti tekseristen ótip jatady. Degenmen ol ekobeketten ekologııaǵa zııan keltiretin avtokólikter de ótip ketýi múmkin. Bul rette búgingi reıdke shyqqan jyljymaly ekologııalyq beketterdiń róli zor. Sebebi olardyń kúshimen álgindeı baıqalmaı ótip ketken avtokólikterdi anyqtap jatyrmyz. Sondaı-aq, qalada kóptegen eski avtokólikpen júretinder, tipti katalızatorsyz júretin júrgizýshiler de kezdesedi. Biz sol sebepti quqyq qorǵaý organdarymen birlesip, ekologııaǵa zııan keltiretin sondaı kólikter men júrgizýshilerdi anyqtap, olarmen kúresip jatyrmyz», — deıdi Rahym Asqarov.
«Renessans+» JShS aǵa ekologi Abdýlhamıt Amanquldyń aıtýynsha, jyljymaly ekobekette benzın, gaz jáne dızelmen júretin avtokólikter tekseriledi.
«Qazir qalada quramynda polıtsııa ekıpajy bar úsh jyljymaly ekobeket aralap júr. Ekobekette arnaıy quraldarmen avtokólikterdi tekseremiz. Jeńil, júk avtokóligi, bárin tekseremiz. Bul qurylǵylar Reseıde jasalǵan. Benzınmen júretin avtokólikter AVTOTEST-02.03 kópkomponentti gaz analızatorymen tekseriledi. Dızelmen júretin kólikterdi META-01 MP 0.1(LTK, K) ólshegimen tekseremiz. Bul rette lastaýshy zattardyń normatıvin buzǵan avtokólik ıelerine ÁQBtK 334-baby boıynsha ákimshilik jaýapqa tartylady. Ol boıynsha jeke tulǵaǵa — 10 AEK, zańdy tulǵaǵa — 100 AEK mólsherinde eskertý nemese aıyppul kózdelgen. Jyl ishinde qaıtalanǵan jaǵdaıda avtokólik ıelerine jeke tulǵaǵa — 20 AEK, zańdy tulǵaǵa — 200 AEK mólsherinde aıyppul salynady. Jalpy bir kúnde 50-ge jýyq avtokólik tekserilse, onyń 15-20-sy aýaǵa zııanyn tıigizetin avtokólik bolyp shyǵady. Qalanyń qaı jerinde júremiz dep aldyn ala aıta almaımyz. Sebebi bizdiń marshrýt aldyn ala belgilenbeıdi. Biraq Almaty qalasy aýmaǵynda tekseris júrgizemiz», — deıdi Abdýlhamıt Amanqul.
Onyń aıtýynsha, kólikten shyǵatyn ýly gaz ben tútinniń deńgeıi kólikti shyǵarýshy el men kóliktiń shyqqan jylyna baılanysty.
«Bul rette 0 men 5,6 arasynda ekologııalyq klass bar. 0 men 2-shi klass arasynda jeńil avtokólikterdiń normasy — 0,50. 3-shi klasstan joǵarǵy kólikterde benzın — 0,30, karbıýratory bar avtokólikterdiń normasy — 3,5 aspaýy tıis. Jalpy, 4-shi klassqa deıingiler týrbınasy bar jáne joq bolyp bólinedi. Týrbınasy barlar — 3-ke deıin, týrbınasy joqtar — 2,5-ǵa deıin, 4-shi klasstan joǵarylardyń normasy 1,5-nan aspaýy kerek», — deıdi ol.
Aıta keteıik, bizdiń jibergen saýalǵa Almaty qalalyq polıtsııa departamentiniń jergilikti polıtsııa qyzmeti reıd bastalǵaly beri 300-den astam avtokólik tekserilgenin habarlady.
«ÁQBtK 334-baby boıynsha 121 ákimshilik hattama toltyryldy», — dep jaýap berdi polıtsııa.
Eske salsaq buǵan deıin Almatyda kólikterden shyǵatyn ýly gaz ben tútininiń deńgeıin ólsheý boıynsha reıd bastalǵanyn habarlaǵanbyz.
2021 jyldan beri Almatyda 19 ekobeket jumys istep tur.
