Almatyda eki kúnde 21 zańsyz ornatylǵan dúńgirshek buzyldy
ALMATY. KAZINFORM – Almatyda memlekettik qordyń jerinde zańsyz ornatylǵan statsıonarlyq emes saýda nysandaryn bólshekteý jumystary bastaldy.
Almaty ákimdiginen málim etkendeı, megapolıste eki kún ishinde 21 zańsyz nysan buzyldy. Máselen, Áýezov aýdanynda eki dúńgirshek buzyldy. Onda kondıterlik ónimder men kóshe taǵamdary satylǵan.
– Bul rette nysandar sýmen jabdyqtaýǵa jáne sý burýǵa qoljetkize almaǵan ári elektr jelilerine ruqsat qujattarynsyz ózderi qosylǵan. Kókjıek shaǵynaýdanynda kókónister men nan ónimderin satýmen aınalysqan zańsyz ornatylǵan statsıonarlyq emes saýda núkteleri de buzyldy. Onyń aınalasy abattandyrylmaǵan, bul jergilikti turǵyndarǵa qolaısyzdyq týdyrdy,– dep atap ótti ákimdikten.
Qalalyq Polıtsııa departamenti aýdan ákimdikterimen birlesip, buzý jumystary júrgiziletin oryndar da qoǵamdyq tártip pen qaýipsizdikti qamtamasyz etip jatyr.
Aıta keteıik, qalada 157 statsıonarlyq emes saýda nysandaryn ornalastyrýǵa arnalǵan 142 oryn bekitilgen.
Eske salsaq, buǵan deıin statsıonarlyq emes zańsyz saýda nysandardyń buzylatyny týraly jazǵan edik.