Almatyda dızelmen júretin qansha avtobýs bar
ALMATY. KAZINFORM – Osy jyldyń sońyna deıin Almaty ákimdigi qalalyq baǵyttarda júretin dızeldik avtobýstar parkin tolyǵymen jańartýdy josparlap otyr. Qazir olardyń sany – 1 534.
– Qazir Almaty qalasy men qala mańyndaǵy baǵyttarda 2 718 avtobýs pen trolleıbýs júrip jatyr. Jalpy alǵanda 3 488 tehnıka bar. Onyń 1 534-i dızelmen júretin avtobýs, - dep jaýap berdi Kazinform agenttiginiń resmı saýalyna qalalyq mobıldilik basqarmasy basshysynyń orynbasary Asan Bostanov.
Memleket basshysynyń 2025 jyldyń sońyna deıin qoǵamdyq kóliktiń ekologııalyq taza túrlerine tolyq kóshirýdi qamtamasyz etý jónindegi tapsyrmasyn iske asyrý aıasynda qala baǵyttarynda júretin dızeldik avtobýstardy jańartý josparǵa engizilgen.
– Osyǵan baılanysty bıyl jergilikti bıýdjet qarajatyna gazben júretin 600 avtobýs pen 200 elektrmen júretin avtobýs satyp alynady. Jeke tasymaldaýshylar da gazben júretin 800-ge jýyq avtobýs pen 100-den astam elektr avtobýs satyp alýdy josparlap otyr, - dep qosty Asan Bostanov.
Osyǵan deıin Erbolat Dosaev Almatyda dızeldi avtobýstardy satyp alýǵa tyıym salynatyny týraly aıtqan bolatyn.
Aıta keteıik, Almatyda 18 qańtardan bastap jańa elektr avtobýstary №98 baǵytta jolǵa shyqty.