Almatyda dermatomıkozdar aýrýy órship tur

ALMATY. KAZINFORM – Byltyr Almatyda dermatomıkoz aýrýynyń 189 jaǵdaıy tirkeldi. Bul 2022 jylmen salystyrǵanda 29,5%-ǵa kóp.

Almaty qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqovanyń aıtýynsha, ınfektsııalyq aýrýǵa shaldyqqandardyń 87 paıyzy 14 jasqa deıingi balalar.

Dermatomıkozdar – bul teriniń ústińgi qabattaryn zaqymdaıtyn sańyraýqulaq ınfektsııalary, olarǵa trıhofıtııa, mıkrosporııa jáne taǵy basqalary jatady.

Infektsııa naýqas adammen jáne janýarmen tikeleı nemese janama baılanysta bolǵanda, qol alysý, jeke zattar (kıim, aıaq kıim, taraq, súlgiler, manıkıýr kerek-jaraqtary ), ortaq zattar (kitaptar, qalamdar, jıhazdar, oıynshyqtar) arqyly berilýi múmkin.

«Aýrýdyń ınkýbatsııalyq kezeńi 1 aptadan 1 aıǵa deıingi aralyqty quraıdy. Dermatomıkoz halyq arasynda keń taralǵan. Sonymen qatar, naýqastardyń kópshiligi óz aýrýyna mán bermeıdi, basqalardyń densaýlyǵyna qaýip tóndire otyryp monshaǵa, basseınge, sport zaldaryna, shashtarazdarǵa barady. Osy jaǵdaılarda kommýnaldyq jáne saýyqtyrý mekemeleriniń qyzmetkerleri dermatomıkozdyń taralý qaýpin bilýi jáne olarǵa kelýshilerdiń arasynda ınfektsııanyń taralýyn boldyrmaıtyn qaýipsizdik sharalaryn saqtaýy kerek», - deıdi Ásel Qalyqova.