Almatyda «Damubala» baǵdarlamasyna FaceID júıesi engizildi
ALMATY. KAZINFORM – Almatyda «Damubala» baǵdarlamasyna FaceID júıesi engizildi. Osy arqyly sektsııalar men úıirmelerge qatysýdy baqylaý kúsheıtilmek.
Qala ákimi Erbolat Dosaev jetkizýshilerdiń jaýapkershiligin arttyrý jóninde keńes ótkizdi. Bıyl shyǵarmashylyq jáne sporttyq memlekettik tapsyrysty iske asyrýǵa shamamen 16,5 mlrd teńge bólindi. Úıirmeler men sektsııalarǵa 72 633 bala qatysyp, qyzmetti 1038 jetkizýshi kórsetedi.
Qyzmet kórsetý sapasyn tekserý maqsatynda arnaıy monıtorıng toby qurylyp, quramyna Qoǵamdyq keńes músheleri, máslıhat depýtattary, aýdan ákimdikteriniń ókilderi jáne belsendi azamattar kirdi. Monıtorıng barysynda qala aýdandarynda jumys isteıtin 52 jetkizýshi tekserildi.
Sonyń nátıjesinde mekenjaılardyń naqty bolmaýy, balalar sanynyń sáıkes kelmeýi, qosymsha tólemder alý, antısanıtarııa jáne órt qaýipsizdigi erejelerin saqtamaý sııaqty buzýshylyqtar anyqtaldy.
Mindetine salǵyrt qaraǵan jetkizýshilerdiń isi quqyq qorǵaý organdaryna jáne prokýratýraǵa jiberildi.
Monıtorıng nátıjesinde qaıtalanatyn buzýshylyqtardy boldyrmaý úshin birqatar sheshim qabyldandy. Qatysýdy baqylaýdy kúsheıtý úshin FaceID júıesi engiziledi. Bul júıe balanyń árbir sabaqqa qatysýyn tirkep, tek naqty kórsetilgen qyzmetke ǵana tólem júrgizýge múmkindik beredi.
DamuBala qosymshasynda kún, ýaqyt jáne geolokatsııa tirkeledi. Júıeni engizý jáne onyń jumys isteý shyǵyny jyldyń sońyna deıin qalalyq bıýdjet esebinen óteledi. Jetkizýshiler aýdan ákimdikterimen qosymsha kelisimderge qol qoıady.
Sonymen qatar, baǵdarlamany odan ári jetildirý jáne kórsetiletin qyzmettiń sapasyn arttyrý úshin jattyqtyrýshylar men nusqaýshylardyń biliktiligine, ǵımarattardyń ólshemderi men jabdyqtalýyna, qaýipsizdik tehnıkasyna qoıylatyn talaptar ázirlenip, jetkizýshilermen jasalatyn kelisimderge engiziledi.
Sondaı-aq, qalanyń 8 aýdanynda bilim berý qajettiligine taldaý júrgizilip, sol negizde qyzmet túrlerine suranys qalyptastyrylady.
Buryn kórsetilgen qyzmetterge tólem jasaý máselesi kóterilgen bolatyn. Qala ákiminiń tapsyrmasyna sáıkes, oryndalǵan jumystar aktisi tekserilgennen keıin barlyq jaýapty jetkizýshige jaqyn arada tıisti tólem júrgiziledi.
Osyǵan deıin shahar basshysy Almaty - «Damubala» baǵdarlamasyna jetkilikti kólemde aqsha bólgen jalǵyz óńir ekenin aıtqan bolatyn.
