Almatyda dabyl júıesi iske qosylady

ALMATY. KAZINFORM — Almatyda 30 sáýir kúni saǵat 11:00–de sırena dybystary iske qosylady. 

Almaty qalasynyń Tótenshe jaǵdaılar departamenti málim etkendeı, jalpy qalalyq josparly seısmıkalyq jattyǵý ótkiziledi. 28 sáýirden bastap tele-radıoarnalarda aldaǵy josparly jattyǵý týraly beınerolıkter men sabyr saqtaýǵa shaqyratyn habarlamalar kórsetilip jatyr.

Seısmıkalyq jattyǵý ótetin kúni saǵat 11:00–de qalalyq habarlaý júıesi iske qosylady: sırenalyq-daýys habarlaý qurylǵylary, tele-radıoarnalardy avtomatty túrde toqtatyp, shuǵyl aqparat berý, mobıldi qosymshalar arqyly habarlamalar jiberý josparlanǵan.

Osyǵan baılanysty tótenshe jaǵdaılar departamenti turǵyndar men qala qonaqtaryn sabyr saqtaýǵa shaqyrdy.

— Dybystyq sıgnaldy estigen kezde dereý teledıdar men radıoqabyldaǵyshty qosyp, ınternet-resýrstar men mobıldi qosymshalar arqyly resmı aqparat alyp, odan ári áreket etý boıynsha nusqaýlarmen tanysý qajet. Seısmıkalyq jattyǵý bastalǵanǵa deıin dabyl shabadanyn daıyndańyz, qaýipsiz jerge aparatyn eń qysqa joldy anyqtańyz. Esterińizge sala keteıik, qaýipsiz oryn — bul elektr jelilerinen, aǵashtardan jáne ǵımarattardan alys ornalasqan ashyq alań, —delingen habarlamada.

Eske salaıyq, Almatyda 384 azamattardy qabyldaý pýnkti jumys istep tur.