Almatyda burynǵy áıelin urǵan er adamnyń ústinen is qozǵaldy

ALMATY. KAZINFORM – Kúıeýinen taıaq jegen kezekti Saltanat esimdi áıeldi tez arada qutqarý kerek. Bul týraly «Detı pod zaşıtoı» jeke qorynyń jetekshisi Janna Ahmetova Facebook paraqshasynda jazdy.

Janna Ahmetova áıelin aıasýyz urǵan er adamnyń vıdeosyn jelige saldy. Vıdeoda er adamnyń áıeliniń telefonyn jerge soǵyp, syndyrǵanyn, keıin áıeldi turǵyn úıdiń aýlasynda aıaýsyz urǵanyn kórýge bolady.

«Saltanat esimdi kezekti áıeldi tez arada qutqarý kerek. Onyń esimi shynymen de Saltanat. Ol bul qubyjyqpen 11 jyl birge turǵan soń, ajyrasý týraly sheshim qabyldaıdy. Odan áreń qutylǵan áıel balalaryn alyp, Tarazdan Almatyǵa kóshedi. Er adam áıeldiń artynan kelip, ony qaıtaryp alýǵa májbúrlegen. 1 sáýirde Life Town turǵyn úı kesheninde ol áıelge tıisip, telefonyn syndyrǵan soń, áıeldi uryp-soqqan. Onyń qandaı jyndy ekenin kórińizder. Balalarynyń týǵan anasyn qandaı kúshpen urǵanyn kórińizder. Ol urmas buryn jan-jaǵyna muqııat qarap, daıyndalyp aldy», — dep jazdy Janna Ahmetova.

Janna Ahmetova er adamnyń ústinen jazylǵan aryz sáýir aıynyń basynan beri Almaly aýdanynyń polıtsııa basqarmasynda jatqanyn, saraptamanyń áli daıyn emes ekenin jazdy.

«Ońbaǵan Tarazǵa ketip qaldy. Estýimshe, ol sol jaqta belgili zańger ma, advokat pa, sondaı birdeńe. Múmkin bireýlerińiz ony tanyǵan shyǵarsyzdar, muqııat qarańyzdarshy. Ne sebepti ol áli ustalmaǵan? Kezekti áıel ólimin kútip otyrmyz ba», — dedi Janna Ahmetova.

Almaty qalalyq polıtsııa departamenti oqıǵa boıynsha tekseris júrgizilgenin habarlady.

«Jaýapqa tartý úshin jınalǵan materıaldar sotqa joldandy», — dep jazdy qalalyq polıtsııa depatamentiniń baspasóz qyzmeti.