Taǵy bir Saltanat taıaq jedi: Almatyda burynǵy áıelin urǵan er adam keshirim surady
ALMATY. KAZINFORM – Almatyda kóshede burynǵy áıelin uryp-soqqan Aleksandr Kım qazaqstandyqtardan keshirim surady.
«Qurmetti qazaqstandyqtar. Men - Aleksandr Kım, burynǵy jubaıym Saltanat ekeýmiz túsip qalǵan vıdeoǵa baılanysty úndeý jazyp otyrmyn. Eń aldymen, Saltanattyń ata-anasy men týǵandarynan keshirim suraımyn. Meniń bul áreketim aqtaýǵa jatpaıdy. Qandaı jaǵdaı bolmasyn, Saltanatqa qol kótermeýim kerek edi», - dep bastady sózin ol.
Aıtýynsha, Saltanat ekeýi úlgili otbasy bolǵan.
«Onymen 11 jyl birge turdyq. Úlgili otbasy boldyq. Bir-birimizdi jaqsy kórdik. Jas otbasy armandaıtynnyń bári boldy. Saltanat meniń tórt balamdy dúnıege ákeldi. Basqa otbasyndaǵydaı bizde de janjal bolyp turdy. Sońy ajyrasýǵa ákeldi. Biraq sezim joıylǵan joq», - deıdi Aleksandr.
Sonymen qatar, ol qyzǵanyshtan burynǵy áıeliniń telefonyn syndyryp, ıterip jibergenin aıtty.
«Men ony uryp-soqpadym, tek qatty ıterip jiberdim. Sol sátte emotsııaǵa boı aldyrdym. Sodan keıin birden Tarazǵa qaıttym. Aryz týraly áleýmettik jelidegi vıdeodan bildim. Onyń betinde eshqandaı jara joq. Qoǵamda meni Qýandyq Bıshimbaevqa teńep, sonyń qataryna qoıǵandaryn qalamaımyn. Áıelge qol kóterýge bolmaıdy jáne men ózimdi osy úshin kinálaımyn», - dedi Saltanattyń burynǵy kúıeýi.
Saltanattyń ózi de áleýmettik jelide post shyǵarǵan edi. Onyń aıtýynsha, otbasynda eshqashan tynyshtyq bolmaǵan.
«Men úshin óte qıyn, biraq men endi úndemeı qalmaımyn. Men zorlyqshymen 11 jyl nekede boldym, 4 balamyz bar. Osynshama jyldar boıy moraldyq jáne fızıkalyq zorlyq-zombylyq kórip keldim. Sońǵy bir jylda onymen ómir súrý múmkin bolmady. Judyryq jumsaý men qorlaý jıilep ketti. Men bul adamnan qorqamyn. Ol - zańger. Onyń baılanysy bar jáne bárin qońyraý soǵý arqyly sheshedi», - dep jazdy Saltanat óziniń Іnstagram-daǵy paraqshasynda.
Buǵan deıin «Detı pod zaşıtoı» jeke qorynyń jetekshisi Janna Ahmetova Facebook paraqshasynda kúıeýinen taıaq jegen kezekti Saltanat esimdi áıeldi tez arada qutqarý kerek dep dabyl qaqqan edi.
Osy jaǵdaıǵa baılanysty Almaty qalalyq polıtsııa departamenti tekseris júrgizilgenin habarlady.
«Jaýapqa tartý úshin jınalǵan materıaldar sotqa joldandy», — dep jazdy qalalyq polıtsııa depatamentiniń baspasóz qyzmeti.
