Almatyda bir jylda 300-ge jýyq egiz dúnıege keldi

ALMATY. KAZINFORM – «Azamattarǵa arnalǵan úkimet» memlekettik korporatsııasynyń Almaty qalasy fılıalynyń málimetinshe, megapolıste byltyr 40 846 náreste ómirge kelgen.

Sonyń ishinde 300-ge jýyq egiz, al úsh otbasyda úshem dúnıege keldi.

Alataý aýdanynda 62 egiz sábı týǵan, bul - eń joǵary kórsetkish. Odan keıingi oryndarda Túrksib aýdanynda - 45 egiz jáne 1 úshem, Naýryzbaı aýdanynda 42 egiz jáne 1 úshem dúnıege esigin ashty.

Al Medeý aýdanynda 36 egiz jáne 1 úshem, Bostandyq aýdanynda 33 egiz, Áýezov aýdanynda 30 egiz, Almaly aýdanynda 27 egiz, al Jetisý aýdanynda 23 egiz sábı tirkeldi.

- Qazir balanyń týýyn tirkeý birneshe tásil arqyly júzege asyrylady. Qyzmetti proaktıvti formatta rásimdeýge bolady: bala dúnıege kelgennen keıin bir táýlik ishinde ananyń telefon nómirine 1414 qysqa nómirinen qajetti derekterdi suratatyn quttyqtaý SMS-habarlama jiberiledi. Sondaı-aq ekinshi deńgeıli bankterdiń mobıldi qosymshalary, elektrondy úkimet portaly jáne Halyqqa qyzmet kórsetý ortalyqtary arqyly rásimdeýge múmkindik bar, - dep habarlady korporatsııa fılıaly.

Eske salaıyq, memleket tarapynan jańa týǵan balaǵa beriletin birjolǵy járdemaqy mólsheri - birinshi, ekinshi jáne úshinshi balaǵa - 38 AEK, al tórtinshi jáne odan keıingi balalarǵa - 63 AEK. Egizder, úshem nemese tórtem dúnıege kelgen jaǵdaıda, járdemaqy ár balaǵa jeke-jeke qarastyrylady.

Buǵan deıin Habıba, Halıma jáne Hamıda esimdi shymkenttik úshem úıine shyǵaryldy.