Almatyda bilim berý salasyna qosymsha 4 mlrd teńge bólinedi
ALMATY. KAZINFORM – Almatyda áleýmettik turaqtylyqty qamtamasyz etý aıasynda 8,3 mlrd teńge kóleminde qosymsha qarjylandyrý bólinedi. Osy somanyń 4 mlrd teńgesi bilim berý salasyn damytýǵa arnalǵan. Bul týraly máslıhattyń kezekti sessııasynda Almaty qalasy Qarjy basqarmasynyń basshysy Qanat Sýhambekov málimdedi.
Qarajattyń bir bóligi bilim berý obektilerin seısmıkalyq kúsheıtý jáne rekonstrýktsııalaý jónindegi jumystardy aıaqtaýǵa baǵyttalady.
Atap aıtqanda, Sı Sınhaı kóshesindegi balabaqshany seısmıkalyq kúsheıtý jáne Bostandyq aýdanynyń Orbıta-3 shaǵyn aýdanyndaǵy balabaqshany jańartý jumystary da qarqyndy júrip jatyr. Osy nysandardyń qurylysyn aıaqtaý úshin 2025 jyldyń shildesine qosymsha 1 mlrd teńge bólinedi.
«Sondaı-aq qurylys jáne rekonstrýktsııalaý boıynsha konkýrstyq rásimderdi ótkizýge qarajat bólý josparda tur. Alataý jáne Naýryzbaı aýdandaryndaǵy 3 balabaqsha; Alataý, Bostandyq, Medeý jáne Túrksib aýdandaryndaǵy 5 mektep; Alataý aýdanynyń Saıaly shaǵyn aýdanynda 1 damý jáne shyǵarmashylyq ortalyǵy bar. Sondaı-aq 26 mektepti pándik stendtermen jáne partalarmen jaraqtandyrý kózdelgen. Osylaısha, qosymsha qarajat oqý jaǵdaılaryn jaqsartýǵa jáne qaladaǵy bilim berý sapasyn arttyrýǵa baǵyttalatyn bolady», - dedi ol.