Almatyda bıyl qansha shaqyrym jańa jol salynady

ALMATY. KAZINFORM — Almatynyń birneshe shaǵyn aýdanynda bıyl jańadan jol salynatyny belgili boldy.

Almaty qalasy jol ınfraqurylymyn damytý basqarmasynyń málimetinshe, 2026 jyly «Aqjar», «Boraldaı», «Rahat — Mádenıet» yqsham aýdandarynda jalpy uzyndyǵy 68,5 km jańa jol salý josparlanǵan.

Odan bólek «Terekti» shaǵyn aýdanynda uzyndyǵy 27,7 km bolatyn jańa kóshelerdiń qurylysyna jobalyq-smetalyq qujattama ázirlengen.

— Jol qurylys jumystary ınjenerlik jelilerdiń qurylysy aıaqtalǵannan keıin bastalady, — dep habarlady vedomstvo.

Eske salaıyq, Almatyda 2025 jyly shaǵyn aýdanda jalpy uzyndyǵy 35 km jańa jol salyndy. Sonymen qatar 347 kóshede 281 km, onyń ishinde 15 magıstraldyq kóshe 40 km ortasha jóndeý jumystary júrgizildi.

Jol ınfraqurylymyn damytý basqarmasy bıyl qala aýmaǵynda 30 km trotýarlar men velojoldarǵa jóndeý jumystaryn júrgizý josparlanǵanyn atap ótti. Onyń ishinde Abaı dańǵylyn jáne Saın kóshelerin uzartý jumystary sheńberinde 3,8 km jańa velojol salý qarastyrylǵan.

Al megapolıste osy jyly jóndeletin kóshelerdiń tizimi áli naqty bekitilmegen.

— Qala kóshelerinde ortasha jóndeý jumystaryn júrgizý maqsatynda aýdandyq ákimdikterdiń ótinimderi jınaqtalyp, qazir atalǵan tizimdi kelisý úshin qalalyq kommýnaldyq qyzmetterge joldandy. Tizim tolyq kelisilgennen keıin 2026 jyly ortasha jóndeý jumystary júrgiziletin kósheler sany jáne shaqyrymy anyqtalatyn bolady, — dep túsindirdi basqarmadan.

Buǵan deıin Almatyda 2026 jyly qandaı kósheler uzartylatynyn jazǵanbyz.