Almatyda bıyl ashylǵan erte ońaltý ortalyǵy 57 balaǵa kómektesti

ALMATY. KAZINFORM — Almaty qalalyq perınatologııa jáne balalar kardıohırýrgııasy ortalyǵynda 3 aıdan 3 jasqa deıingi erekshe qajettiligi bar balalar zamanaýı ádisteme boıynsha erte ońaltýdan óte bastady. 

«Qamqorlyq» erte ońaltý ortalyǵy Perınatologııa jáne balalar kardıohırýrgııasy ortalyǵynyń bazasynda bıyl tamyz aıynda ashyldy. Qazirge deıin munda 57 bala kómek aldy. Ońaltý protsedýralary tolyq MÁMS esebinen júrgiziledi, jeńildik sanatyndaǵy balalar medıtsınalyq kómektiń barlyq túrin tegin alady.

Erte aralasý ortalyǵynyń meńgerýshisi Shamshıgúl Qudajanovanyń aıtýynsha, ortalyqtaǵy em Daýn sındromy, sóıleý men psıhomotorlyq damýdyń kesheýildeýi, ortalyq júıke júıesiniń zaqymy men tirek-qımyl júıesiniń týa bitken aqaýy bar balalarǵa baǵyttalǵan.

— «Qamqorlyq» ortalyǵyna joldamany ata-analar tirkelgen emhanadan alady. Erte aralasý arqyly sábıdiń damýyn túbegeıli ózgertýge bolady. Munda biz balanyń damýyna, qabiletin ashyp, aınalasymen qarym-qatynas jasap úırenýine múmkindik beretin keńistik quramyz, — dedi Shamshıgúl Qudajanova.

Ortalyqta shýngıt pen tuzdy bólme, sensorlyq bólme, sondaı-aq ımmersııalyq vanna bar. Ár balaǵa jeke baǵdarlamany nevrolog, reabılıtolog, klınıkalyq psıholog, neonatolog, fızıoterapevt, logoped jáne defektologtardan quralǵan komanda ázirlep beredi.

Medıtsınalyq saqtandyrý qorynyń málimetinshe, 2019 jyly Almatynyń tórt ortalyǵynyda balalarǵa reabılıtatsııalyq kómek kórsetilip, jylyna 481,8 mln teńge qarjy bólingen. Al 2025 jyldyń 9 aıynda óńirde 400 myńnan astam reabılıtatsııalyq is-shara júrgizilip, qarjylandyrý kólemi 4 mlrd teńgeden asyp túsken.

Eske salaıyq, bıyl Túrkistanda 90 oryndyq «Shuǵyla» ońaltý ortalyǵy ashyldy.