Almatyda bıyl 7 myńnan astam turǵyn baspanamen qamtylady

ALMATY. KAZINFORM – 2025 jyly Almatyda 7 284 adam qonys toıyn toılaıdy.

– Osy jyly 7 284 almatylyq baspanaly bolady. Onyń ishinde jetim balalar bar. Sondaı-aq belgilengen 20% kvotaǵa sáıkes kópbalaly otbasylardy, halyqtyń áleýmettik osal toptaryn jáne bıýdjettik uıymdar qyzmetkerlerin qosa alǵanda, azamattardyń neǵurlym osal sanattaryna turǵyn úı beriledi,– dep atap ótti qalalyq ákimdikten.

Aıta keteıik, kommýnaldyq turǵyn úı qorynan páter kezek tártibimen ǵana beriledi. 2024 jyly osy baǵdarlama boıynsha 5 594 adam baspanamen qamtamasyz etildi.

– Baǵdarlama aıasynda 2000 azamat kommýnaldyq turǵyn úı qorynan jaldamaly páterler aldy. Onyń ishinde 404 páter jetim balalarǵa bólindi, bul berilgen turǵyn úıdiń jalpy sanynyń 20% - na sáıkes keledi. Sonymen qatar, ótken jyly 257,7 mln teńgege 207 turǵyn úı sertıfıkaty tabystaldy. Sertıfıkatty 1 jáne 2 toptaǵy múgedekter, múgedek balalary bar otbasylar, kópbalaly otbasylar jáne jetim balalar aldy,– dep atap ótti ákimdikten.

Osyǵan deıin Almatyda 43 myńnan astam adam baspana kezeginde turǵanyn jazǵanbyz.

Qazir qala aýmaǵynda 171 turǵyn úı kesheni qurylysy júrip jatyr.