Almatyda bıyl 200-den astam egiz ómirge kelgen
Almatyda jyl basynan beri 217 egiz ómirge keldi. Olardyń arasyna úshemder de bar, dep habarlaıdy Kazinform.
«Azamattarǵa arnalǵan úkimet» memlekettik korporatsııasy Almaty qalasy fılıalynyń aýdandyq AHAJ bólimderiniń málimetinshe, bıyl Bostandyq aýdanynda eń kóp egiz ómirge kelgen - 39, Túrksib aýdany – 38, Alataý aýdany – 31, Medeý aýdany – 30, Almaly aýdany – 29, Áýezov aýdany – 28, Jetisý aýdany – 13, Naýryzbaı aýdany – 8 egiz, 1 úshem ómirge kelgen.
«Bul óte qýanarlyq jaǵdaı. Elimizde halyq sanynyń ósip jatqany – jaqsy qubylys. Talaı náýbetti basynan ótkerip, ósý qarqyny báseńsip qalǵan halqymyz, bıyl 20 mıllıondyq mejege jetip otyr. Elimizde halyqtyń áleýmettik jaǵdaıyna asa mán berilip, analardyń da alańsyz balaly bolýyna jaǵdaılar qarastyrylyp jatyr. Bosanǵanǵa deıingi, bosanǵannan keıingi járdemaqylary ósti. Árbir bala týylǵanda beriletin járdemaqylar da jyl saıyn ósip otyr. Kórsetiletin memlekettik qyzmetter proaktıvti jáne kompozıtti nusqalarǵa kóshirildi. Analar kóp qyzmetterdi HQO-ǵa kelmeı-aq onlaın alatyn boldy», - deıdi «Azamattarǵa arnalǵan úkimet» memlekettik korporatsııasy Almaty qalasy fılıaly dırektorynyń orynbasary Farıda Bókijanova.
Aıtý kerek, álemde búgingi kúni 80 myńǵa jýyq egiz bar. Resmı málimet boıynsha jyl saıyn álemde 1,6 mıllıon egiz ómirge keledi. Egizderdiń ómirge kelýi boıynsha Qazaqstan álemde 48 orynda tur.
Sondaı-aq, «Azamattarǵa arnalǵan úkimet» memlekettik korporatsııasy AHAT bólimderiniń málimetinshe, almatylyqtardyń kópshiligi balalaryna Islam dinine qatysty esimderdi qoıǵan. Mysaly, Muhammed, Ál-Muhammed, Islam, Muhammedálı, Omar, Abdrahman, Fatıma, Raıana, Káýsar, Aısha, Medına, ıAsına, sondaı-aq, kóp kezdesetin esimderdiń ishinde tarıhı tulǵalar men qaıratkerlerdiń esimderi de bar. Máselen, Abylaıhan, Qazybek, Ábilhaıyr, Kenesary, Álıhan, Ámire, Nursultan, Qasym-Jomart, Han, Aıǵanym, Bórte, Zere, Tomırıs jáne t.b. Sonymen qatar, Aldııar, Aısultan, Alınur, Nuralı, Alııar, Aıon, Aılın, Іnjý , Marjan, Asylym, Marıam, Sofııa, Aıala syndy qazirgi zamannyń esimderi de ata-analar tańdaǵan.
«Áıel adam úshin ana bolýdan asqan baqyt joq shyǵar. Balalardyń dúnıege kelýi teńdesi joq qýanysh ákeledi jáne olarmen baılanysty barlyq qıyndyqtar birtindep umytylady. Onyń ústine bir emes, egiz sábı dúnıege kelip jatsa, óziń jáne týǵan-týystar úshin de qýanysh eselene túsedi eken», - dedi ana baqytymen bólisken Dınara Abdýkarımova.
Aıta keteıik, bıyl qańtar-qazan aılarynda Almatyda 29 560 bala ómirge keldi. Onyń 15 251 - ul, 14 309 – qyz, olardyń arasynda - 216 egiz, 1 úshem ómirge keldi. Bıyl tamyz aıy nárestelerdiń kóp týylýymen erekshelendi. Bul aıda 3310 bala ómir esigin ashty.
