Almatyda bıyl 100 kópqabatty úı kúrdeli jóndeýden ótedi
ALMATY. KAZINFORM — Bıyl Almatyda 2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdasy aıasynda kóppáterli turǵyn úılerde 100 lıfti jańartylady. Bul týraly qalalyq ákimdiktiń Kazinform saýalyna bergen jaýabynda aıtyldy.
Kommýnaldyq ınfraqurylymdy damytý basqarmasynan málim etkendeı, budan bólek 100 kóppáterli úıdi kúrdeli jóndeýden ótkizý josparda.
— Byltyr megapolıste 54 kóppáterli turǵyn úıde 100 lıft aýystyryldy, sondaı-aq 118 úıde kúrdeli jóndeý júrgizildi, onyń ishinde: 59 shatyr, 7 qasbet, 7 kireberis, 6 elektr jelisi, 37 ınjenerlik jeli, bir avtomattandyrylǵan jylý pýnkti jáne jalpy úıge ortaq jylýdy esepteıtin 25 qural bar, — delingen basqarma jaýabynda.
Turǵyn úı qoryn jańǵyrtý baǵdarlamasyna qalaı qatysýǵa bolady?
- Aldyn ala smetany jáne aqaý aktisin ázirleýge basqarý organynan ótinish.
- Jalpy jınalys hattamasy (menshik ıeleriniń 51%-dan astamynyń kelisimimen).
- Bekitilgen aqaý aktisi jáne aldyn ala smetalyq esep.
- Páterge menshik quqyǵy týraly bastamashyl toptan anyqtama.
- Páterler men turǵyn emes úı-jaılardyń alańdary.
- Basqarý organynyń quryltaı qujattary jáne qatysýshy úıge qyzmet kórsetý quqyǵyn rastaý (hattama, shart, senimhat).
- Úıdiń tehnıkalyq tólqujatynyń kóshirmesi.
Ótinim bergennen keıin «Almaty turǵyn úı» JShS mamandary ǵımarattyń jaı-kúıine baǵa berip, modernızatsııalaýdyń ońtaıly nusqalaryn usynady.
Máselen, atalǵan baǵdarlama aıasynda Raıymbek dańǵyly boıynda ornalasqan toǵyz qabatty úıdiń ınjenerlik jelileri, shatyry kúrdeli jóndeýden ótip, lıftileri aýystyryldy.
— Endigide lıftimiz jańa turǵyn úılerdegideı: onyń qaıda jáne qalaı kóterilgenin baqylap otyrýǵa bolady. Barlyǵy túsinikti, yńǵaıly, ádemi boldy. Eń bastysy turǵyndar rıza, — deıdi Múlik ıeleri birlestiginiń tóraǵasy Elmıra Nartbaeva.
Turǵyn úıdi jańǵyrtý baǵdarlamasynyń artyqshylyqtary:
— 7 jyldan 15 jylǵa deıin bólip tóleý.
— Paıyz eseptelmeıdi.
— Oryndalǵan jumystarǵa kepildik merzimi — 24 aı.
Aıta keteıik, Almatyda paıdalaný merzimi ótip ketken 45 lıft bar.
Eske salaıyq, 2025 jyldyń 15 aqpanynan bastap Keden odaǵynyń jańartylǵan tehnıkalyq reglamenti kúshine enedi, oǵan sáıkes 25 jyl qyzmet etken lıftilerdi aýystyrý qajet.