Almatyda Batyr panfılovshylar shyńyna kóterilý alpınıadasynyń ýaqyty ózgerdi

ALMATY. KAZINFORM — Qar kóshkini qaýpine baılanysty «Almaty-2024» alpınıadasynyń uıymdastyrý komıteti Batyr – panfılovshylar shyńyna jappaı kóterilý merzimin 2024 jyldyń 7 mamyrynan 12 mamyryna aýystyryldy.

Almaty ákimdiginiń baspasóz qyzmeti málim etkendeı, is-sharany aýystyrý týraly sheshim qalalyq tótenshe jaǵdaılar departamenti, qutqarý qyzmeti, Almaty alpınızm federatsııasy jáne «Shymbulaq» qar kóshkini stansasynyń usynysy boıynsha qabyldandy.

«Tuıyqsý alpagerinen 2024 jyldyń 27-28 sáýirdegi Mánshúk Mámetova asýyna deıingi marshrýtty barlaý aýa temperatýrasy tómendegen kezde qar jamylǵysy 20 sm-ge ulǵaıǵanyn, bul rette kóshkin qaýpi deńgeıi edáýir artqanyn kórsetti. 

Osylaısha, órmeleý baǵyty 12 mamyrda saǵat 05:30-da Medeý bıik taýly muz aıdynynan (1600 m) bastalady. «Shymbulaq» TShK-na deıin jáne odan ári Tuıyqsý, Myńjylqy shatqaldary (3000m) – Mánshúk Mámetova muzdyǵy (3600m) – Mánshúk Mámetova asýy (3900m) – Batyr – panfılovshylar shyńy (4120m). Shyńnyń bıiktigi 4120 metr. Baǵyttyń alpınıstik kúrdeliligi retinde 1A qıyndyq sanattary retinde baǵalanady»,- dep habarlady ákimdikten.

Alpınıadaǵa qatysýǵa barlyq nıet bildirýshiler shaqyrylady, alaıda qatysýshylar aýa raıyna sáıkes jabdyqtalýy jáne taýly týrıstik tájirıbesi bolýy tıis. 

Alpınıadanyń qaýipsizdigin Almaty qalasy alpınızm federatsııasynyń, Taý qutqarýshylar qaýymdastyǵynyń, Almaty qalasy ákimdiginiń qutqarý qyzmeti qamtamasyz etedi. 

Qatysýshylardy tirkeý, ótkizý erejesi men sharttary – «Almaty 2024» alpınıadasynyń saıtynda.