Almatyda bas shyrshany jaǵý rásimi 20 jeltoqsanda ótedi
Almatyda jańa jyldyq shyrshalar, ertegi keıipkerleri, basqa da merekelik atrıbýttar jeltoqsan aıynyń ortasyna qaraı qoıyla bastaıdy. Bul týraly óńirlik kommýnıkatsııalar qyzmeti alańynda Almaty qalasy ákiminiń orynbasary Arman Qyryqbaev aıtty, dep habarlaıdy Kazinform.
Spıker bıiktigi 20 metr bolatyn qalanyń basty shyrshasy Abaı alańynda qoıylatynyn aıtty. Ony resmı jaǵý rásimi men merekelik kontsert 20 jeltoqsanda ótedi.
«Jańa jyl merekesine oraı qalada 60-dan astam shyrsha qoıylady. Qala turǵyndary men qonaqtary úshin túrli taqyryptyq is-sharalar, jańa jyldyq festıvaldar, sheberlik synyptary, jas sýretshilerdiń kórmeleri, kontsertter men úzdik jańa jyldyq beınerolıkke qatysty mobılograftar arasynda baıqaýlar ótedi. Aýdandarda jańa jyldyq jármeńkelerde ótkizý josparlanyp otyr. Sonymen birge, Aıaz atalardyń sherýi ótedi», - dedi Arman Qyryqbaev.
Onyń sózinshe, ınstallıatsııalar, ıllıýmınatsııalar men fotoaımaqtar Panfılov, Jibek Joly kósheleri boıynda, Abaı, Astana alańdary, Tuńǵysh Prezıdent saıabaǵy, Abaı atyndaǵy QUOBT, N.Sats atyndaǵy balalar men jasóspirimder teatry, «Almaty arena» sport kesheni alańdary men ár aýdanda bolady.
"Jappaı syrǵanaý úshin qalada 22 ashyq muz aıdyny uıymdastyrylady. Ashyq muz aıdyndarynyń aýmaǵynda sporttyq oıyn-saýyq baǵdarlamalar, konkýrstar, fleshmobtar, júldelermen utys oıyndary, demalys aımaqtary men kofe-poınttardy uıymdastyrý josparlanyp otyr", - dedi qala ákiminiń orynbasary Arman Qyryqbaev.
