Almatyda balalardy oqytatyn onlaın-servıske qatysty daý týyndady

ALMATY. KAZINFORM – Almatylyqtar balalardy oqytýǵa arnalǵan onlaın-servıs jumysyna shaǵymdandy.

Áleýmettik jelide YaYa kompanııasynan qarajatyn qaıtara almaı júrgen adamdardyń jazbasy kóbeıgen.

Olardyń sózinshe, servıs 1 aqpannan bastap jumysyn toqtatqan. Balalar bilim almasa da, bankter atalǵan qyzmetke bólip tóleý boıynsha aqshany áli de ustap otyr.

– Kompanııa qaıtarylatyn somany bylaı esepteýdi usynady: somanyń 50%-y «qosymshany iske qosqany úshin» ustalady, qalǵan 50%-dan sabaqqa qatysqan kúnderdiń aqysy taǵy shegeriledi. Sońynda bólip tóleý somasyn jappaıtyn mardymsyz aqsha qalady. Mysaly, 360 000 teńge turatyn jyldyq abonement boıynsha 4 aı nemese 38 sabaqqa barǵan jaǵdaıda, qaıtarylýy tıis soma 91 myń teńge dep eseptelgen jáne bul soma kún saıyn azaıyp otyrady, – dep jazdy Aıjan esimdi jeli qoldanýshysy.

Al kompanııa ata-analarǵa resmı úndeý jarııalap, uzaq ýaqyt baılanysqa shyqpaýlarynan oryndy alańdaýshylyq týyndaǵanyn moıyndady.

– Balalar platforma arqyly úıirmeler men sektsııalarǵa 500 myńnan astam ret bardy. Bul ónimniń qajetti ári paıdaly bolǵanyn dáleldeıdi. Osy kezeńde biz balalar ortalyqtaryna 1 mıllıard teńgeden astam aqsha tóledik. Biz óz ıdeıamyzǵa shyn berilip, baǵa saıasatyn ata-analar úshin barynsha tıimdi etýge tyrystyq, óıtkeni balalardyń bos ýaqytyn uıymdastyrý úshin qansha kúsh qajet ekenin óz tájirıbemizden bilemiz. Alaıda jumys barysynda qazirgi qarjylyq model naryqtaǵy júktemeni kótere almaıtyny belgili boldy. Qarapaıym tilmen aıtqanda: abonementter ózin-ózi aqtamaǵany bylaı tursyn, bıznesti shyǵynǵa batyrdy. Bul kassalyq alshaqtyqqa jáne jobanyń operatsııalyq ári qarjylyq qurylymyn qaıta qaraý qajettiligine ákep soqty, – delingen kompanııa habarlamasynda.

Kompanııa óz mindetterin retteý protsesine kiriskenin naqtylady. Bul jaǵdaıǵa qatysty Almaty qalasy polıtsııa departamenti túsinikteme berdi.

Polıtsııa málimetinshe, keıingi 5 kúnde ártúrli aýdan basqarmalaryna birneshe azamattan aryz túsken. Qazirgi ýaqytta olar zerttelip, bir iske biriktirlimek.

– Sońǵy kúnderi atalǵan oqý ortalyǵynyń ákimshiligine qatysty aryzdar túse bastady. Olardyń barlyǵy zerdelenip, taldanatyn bolady. Qylmystyq quqyq buzýshylyq belgileri anyqtalǵan jaǵdaıda quqyqtyq baǵa berilip, Qazaqstan Respýblıkasynyń zańnamasyna sáıkes sharalar qabyldanady, – dep habarlady polıtsııadan.

Eske salaıyq, byltyr Almatyda Tesla Education bilim berý ortalyǵyna qatysty qylmystyq is qozǵalǵan bolatyn.

Keıin Tesla Education daýyna tap bolǵan balalar ózge bilim ortalyqtarynda tegin oqı alatyny belgili boldy.