Almatyda avtobýs júrgizýshisi «Shapaǵat» medalimen marapattaldy
ALMATY. KAZINFORM – Memleket basshysy Qasym-Jomart Toqaev áleýmettik-azamattyq belsendiligi men azamattyq jaýapkershiligi úshin qalalyq avtobýs júrgizýshisiniń biri Qanat Ahmetovti «Shapaǵat» medalimen marapattady.
Memlekettik nagradany Almaty ákiminiń orynbasary Asqar Ámrın tabystady.
– Memlekettik nagradaǵa ıe bolý men úshin úlken qurmet ári zor jaýapkershilik. Bul qoǵam ıgiligi úshin adal eńbek etýge, áriptesterim men jaqyndaryma úlgi bolýǵa yntalandyrady. Qarapaıym eńbek adamdaryna Prezıdenttiń nazar aýdaryp, eldiń damýyna qosqan úlesin moıyndaǵany qýantady, – dedi Qanat Ahmetov.
Eske sala keteıik, buǵan deıin №66 qalalyq marshrýt avtobýsynyń júrgizýshisi Qanat Ahmetov arbadaǵy múgedek jolaýshyǵa nazar aýdaryp, kómek kórsetkeni úshin megapolıs ákimi Erbolat Dosaevtyń atynan alǵys hat pen syılyq alǵan bolatyn.
Qanat Ahmetov tórt balanyń ákesi. «Almatyelektrotrans» kompanııasynda avtobýs júrgizýshisi bolyp jumys istegenine bir jyldaı ýaqyt boldy.
Múgedek jolaýshynyń kólikke arnaıy kótergishtiń kómegimen minýine járdemdesken júrgizýshiniń sýreti áleýmettik jelide taraǵan bolatyn.
Aıta keteıik, Memleket basshysy Qasym-Jomart Toqaevtyń Jarlyǵymen 2025 jyl Jumysshy mamandyqtarynyń jyly dep jarııalanǵan edi.
