Almatyda aýlalardaǵy garajdar májbúrli túrde buzylady

ALMATY. KAZINFORM – Almaty qalasynyń Bostandyq aýdanynda kópqabatty turǵyn úılerdiń aýlalarynda ornalasqan garajdardy buzý jumystary jalǵasady. 

Bul týraly óńirlik kommýnıkatsııalar qyzmetinde ótken baspasóz máslıhatynda aýdan ákimi Sanjar Álın málim etti. onyń aıtýynsha, mundaı garajdar qazirgi zamanyń abattandyrý standarttaryna saı kelmeıdi. 

– Qalada dızaın-kod qabyldandy. Garajdar qalanyń kelbetine saı emes. Jaldaý merzimi ótip ketken garajdar qalanyń menshigine ótedi. Al eger ıeleri óz erkimen buzýdan bas tartsa, biz olardy sot arqyly buzýǵa mindetteımiz, - dedi Sanjar Álın.

Sondaı-aq ol jol boıynda zańsyz ornatylǵan oıyn avtomattaryna toqtaldy.

– Munyń bári zańsyz. Alaıda bizde tikeleı quziret joq. Sondyqtan quqyq qorǵaý organdarynyń jumys tobymen birlesip túsindirý jumystaryn júrgizemiz. Sebebi bul avtomattar qalalyq aýmaqqa ornatylady, bul óz kezeginde ákimshilik aıyppulǵa jáne zańbuzýshylyqqa alyp keledi, - dedi ol.

Spıkerdiń sózinshe, árbir anyqtalǵan jaǵdaı boıynsha aýdan ákimdigi prokýratýra jáne ózge de ýákiletti organdarmen birlesip jumys isteıdi.

– Eger osyndaı faktilerdi kórseńizder, habarlaýlaryńyzdy suraımyz. Sebebi biz bir jerden alyp tastasaq, olar sol kúni basqa kóshege ornatylady. Bul baǵyttaǵy jumys jalǵasady, ary qaraı da kúresetin bolamyz, - dep tolyqtyrdy aýdan ákimi.

Aıta keteıik, Bostandyq aýdanynda kópqabatty úılerdiń aýlalaryndaǵy eski jekemenshik garajdardy buzý jumystary birneshe jyldan beri júrgizilip keledi.