Almatyda áýejaıynda SCAT reısi 10 saǵattan astam keshikken
ALMATY. KAZINFORM - Almaty halyqaralyq áýejaıynda Almaty-Phýket baǵytyndaǵy reıs keshikti.
Jelidegi málimetke sáıkes, Almaty-Phýket baǵytyndaǵy SCAT kompanııasynyń 5235 reısi saǵat 01:35 ushýy kerek bolǵan. Biraq reıs ýaqyty aldymen 05:05-ke, keıin 06:10, 08:00-ge birneshe ret shegerilgen.
SCAT baspasóz qyzmeti bul jaǵdaıǵa baılanysty túsinikteme berdi.
— Ushý aldyndaǵy daıyndyqty júrgizý kezinde qosymsha tehnıkalyq qyzmet kórsetý qajettiligi anyqtaldy. Kútý kezinde jolaýshylarǵa ystyq tamaq pen sýsyndar beriledi. Áýe kompanııasy keshikken reıstiń jolaýshylarynan keshirim suraıdy, - dep habarlady áýe kompanııasynan.
Sondaı-aq SCAT jaýabyna sáıkes, qazir bul reıs boıynsha jolaýshylardy otyrǵyzý júrgizilip jatyr. Ushaq 20 mınýt ishinde jolǵa shyǵady.
Eske salaıyq, buǵan deıin Almatydan Vetnamǵa shyqqan ushaq áýejaıǵa qaıtyp kelýge májbúr bolǵanyn jazǵanbyz.