Almatyda áreketke qabiletsiz adamdardyń quqyǵy júıeli túrde buzylyp kelgen
Medeý aýdany prokýratýrasynyń júrgizgen taldaý nátıjesinde Almaty qalasynda áreketke qabiletsiz adamdardyń quqyqtarynyń júıeli túrde buzylǵandyǵy anyqtaldy, dep habarlaıdy Kazinform Almaty qalasynyń prokýratýrasyna silteme jasap.
«Neke (erli-zaıyptylyq) jáne otbasy týraly» Qazaqstan Respýblıkasy Kodeksiniń 121-babyna sáıkes sot áreketke qabiletsiz dep tanyǵan adamǵa qorǵanshylyqty nemese qamqorshylyqty nemese múlikke qorǵanshylyqty belgileý qajettigi týraly tıisti organdarǵa belgili bolǵan kezden bastap 20 jumys kúni ishinde qorǵanshylyq nemese qamqorshylyq belgilenedi.
Sonymen qatar psıhıkasynyń buzylýynan, basqa da aýrýlardan zardap shegetin 423 adam anyqtaldy, olarǵa uzaq ýaqyt jáne tipti jyldar boıy qamqorshy taǵaıyndalmaǵan.
Mysaly, M. azamatyn 2001 jyly sot áreketke qabiletsiz dep tanyǵan. Onyń zańdy ókili tek 2022 jyly, ıaǵnı 20 jyldan astam ýaqyttan keıin ǵana belgilengen.
Osyǵan uqsas azamat O. qamqorshysy 18 jyl ótkennen keıin, I. azamatyna 10 jyldan keıin, A. azamatyna 9 jyldan keıin taǵaıyndalǵan.
Tek taldaý kezinde ǵana zańdy ókilderi bolmaǵan 110 adam anyqtaldy.
Kórsetilgender olardyń týystarynyń óz is-áreketterine esep bere almaıtyn jáne óz quqyqtaryn óz betinshe qorǵaı almaıtyn adamdardyń densaýlyǵy men múlkine tolyqqandy qamqorlyq jasaı almaıtyn zańdy is-áreketter jasaı almaýyna ákep soqty.
Mundaı jaǵdaı sottardyń sheshimderdi oryndaýǵa ýaqtyly jibermeýinen jáne qorǵanshy jáne qamqorshy organnyń tarapynan baqylaýdyń bolmaýynan týyndaǵan.
Prokýrorlar sondaı-aq ýákiletti organ 47 áreketke qabiletsiz adamnyń múlkine tyıym salmaǵanyn anyqtady.
Sondaı-aq ýaqytynda tyıym salynbaǵannyń kesirinen, esi durys emes R-dyń jalǵyz páterin bógde adamdarǵa ósıet jasaý arqyly tartyp alý áreketine ákep soqty.
Almaly aýdany prokýratýrasynyń talap-aryzy boıynsha zańsyz ósıet jaramsyz dep tanylyp, áreketke qabiletsiz R. qalanyń áleýmettik nysandarynyń birine ornalastyryldy.
Medeý aýdany prokýratýrasynyń usynysy boıynsha qorǵanshy jáne qamqorshy organdardyń 7 laýazymdy tulǵasy jibergen buzýshylyqy úshin tártiptik jaýaptylyqqa tartylyp, buzýshylyqtardy joıý jóninde sharalar qabyldandy.
