Almatyda apatty kópirdiń ornyna jańasy salynady
ALMATY. KAZINFORM – Esentaı ózeni arqyly ótetin kólik kópiri apatty dep tanyldy. Osyǵan baılanysty qala basshysynyń taprsymasymen jańasy salynady.
Almaty ákimdiginen málim etkendeı, osy jyldyń qazan aıynda Kemel shaǵyn aýdanynda Erbolat Dosaevtyń tapsyrmasymen apatty kópirdiń ornyna jańasy salynady.
Jarty ǵasyr buryn paıdalanýǵa berilgen kópir Jolymbet kóshesinde ornalasqan. Kópir apatty dep tanylǵandyqtan, onda mamyr aıynyń sońynan beri kólik qozǵalysy shekteldi.
«Ótken ǵasyrdyń 60-jyldarynda salynǵan kópir qurylymy eshqashan jóndelmegen jáne jaramsyz bolyp qalǵan. Kópir tirekterinde qaýipti jaryqtar paıda boldy, beton konstrýktsııalary jartylaı buzyldy. Kópirdi kózben sholyp tekserý barysynda kópirge kireberisterde úıindilerdiń, sondaı-aq kópirdiń betkeılerindegi topyraqtyń shógýi anyqtaldy»,-dep habarlady ákimdikten.
Almaty ákimi Erbolat Dosaevqa qalalyq mobıldilik basqarmasynyń basshysy Saǵyndyq Telibaev, kópirdi tehnıkalyq tekserý deformatsııalyq tigistiń joqtyǵyn anyqtaǵandaryn jetkizdi. Munyń bári qurylymnyń júk kótergishtigine jáne onyń beriktigine áser etedi. Demek, kópirdi jóndeý múmkin emes. Sondyqtan jańasyn salý qajet.
Jańa kópirdiń jobasy qadalar negizi bar bir aralyqty qurylysty, sondaı-aq kópirge kireberisterdiń júris bóligin qaıta qurýdy kózdeıdi. Jańa qurylym eskiden áldeqaıda úlken bolady. Sonymen, eger apattyq kópirdiń uzyndyǵy 16,8 metr, eni 8,5 metr jáne tirekterdiń bıiktigi 7 metr bolsa, onda jańa kópirdiń uzyndyǵy 24 metr, eni 13,5 metr, bıiktigi 9 metr bolady. Bul kópirden ótýdi jolmen bir deńgeıde qamtamasyz etýge múmkindik beredi.
Jaıaý júrginshilerdiń jaılylyǵy men qaýipsizdigin qamtamasyz etý úshin Erbolat Dosaev eki jaqtan da trotýarlardy jaılastyrýdy, sondaı – aq kópir «Kemel», «Kókjıek» shaǵyn aýdandary men «Qoıanqus», «Yntymaq», Jańadáýir, Jańatalap poselkeleri turǵyndary úshin kólik baılanysyn qamtamasyz etetindigin eskerip, qysqa merzimde jumystar júrgizýdi tapsyrdy.
«Bul áleýmettik mańyzy bar nysan, kópir arqyly birneshe avtobýs marshrýttary, sonyń ishinde mektep marshrýttary ótedi, sondyqtan barynsha qysqa merzimde jol qozǵalysynyń qamtamasyz etý kerek. Qajetti qarajat bólinetin bolady, qozǵalys osy jyldyń qazan aıynda ashylýy tıis. Kópir ondaǵan jyl boıy adamdarǵa qyzmet etetindeı sapaly bolǵany jón», - dep atap ótti Erbolat Dosaev.
Qazirgi ýaqytta jańa kópir salý boıynsha jóndeý jumystary aıaqtalǵanǵa deıin avtokólik ıeleri atalǵan ýchaskeni Muhamedjan Seralın kóshesi arqyly aınalyp óte alady.
