Almatyda alǵashqy qar jaýdy
ALMATY. KAZINFORM – Almatynyń joǵary bóliginde qar jaýyp jatyr. Qala turǵyndary alǵashqy qardyń beınejazbalaryn áleýmettik jelilerde bólisip jatyr.
Almatyda jaýǵan jaýynnyń arty qarǵa ulasty.
Áleýmettik jelide Medeýde jaýǵan qardyń vıdeolary paıda boldy.
«Shymbulaq» taý-shańǵy kýrortynyń bazalyq beketterinde ornatylǵan beınekameralardan orta jáne joǵarǵy betkeılerdi qar basyp jatqanyn kórýge bolady. https://shymbulak.com/ru/live
Tolassyz jaýǵan jańbyr saldarynan Almaty joldarynda keptelis. 2GIS kartasyndaǵy aqparat boıynsha, saǵat 15:30-da jol keptelisi 8 ballǵa baǵalandy. Ásirese, Nazarbaev, Rysqulov, Raıymbek, Abaı dańǵyldarynyń ýchaskelerinde baıqalady.
«Qazgıdromet» RMK málimetinshe, Almatyda túnde aýa temperatýrasy – 2 gradýsqa deıin tómendeıdi.
Buǵan deıin jańbyrǵa baılanysty kommýnaldyq qyzmet kúsheıtilgen rejımge kóshkeni týraly jazǵan bolatynbyz.
Qala bıligi avtomobıl júrgizýshilerine dóńgelekti aýystyrýǵa eskertý jasady.
«Joldaǵy qaýipsizdikti qamtamasyz etý maqsatynda avtokólik júrgizýshilerine jazǵy dóńgelekterin qysqy dóńgelekke ýaqtyly aýystyrýdy usynamyz. Jolda kóktaıǵaq ári qozǵalys bóliginde taıǵanaq qabyrshyqtardyń paıda bolýyna baılanysty júrgizýshiler qozǵalys jyldamdyǵyn tómendetip, avtomobılder arasyndaǵy qashyqtyqty arttyryp, kenetten manevr jasaýdan, tejegishti kilt basýdan aýlaq bolǵany jón»,- delingen habarlamada
Almatynyń kommýnaldyq qyzmetteri kóktaıǵaqqa qarsy jumystardy jedel júrgizýge daıyn. Bul jumysqa 10 merdiger uıym, 841 tehnıka jáne 1405 jumysshysy jumyldyryldy. Kóktaıǵaqqa qarsy 76 tonna materıal daıyndaldy.
