Almatyda AQSh-tyń Bas konsýldyǵy qaı jerde salynatyny belgili boldy

ALMATY. KAZINFORM — Almaty ákimdigi Medeý aýdanyndaǵy negizgi qurylys nysandarynyń naqty ornalasýyna qatysty túsinik berdi.

Almaty qalalyq jer qatynastary basqarmasynyń málimetinshe, zamanaýı kópbeıindi Kongress ortalyǵy jeke, arnaıy bólingen ýchaskede salynady. Ýchaskeniń shekaralary: Aldar Kóse kóshesi (soltústik) — 8-gvardııalyq dıvızııa kóshesi (shyǵys) — Shýkshın kóshesi (ońtústik) — Jamaqaev kóshesi (batys).

— Jalpy alańy — 11 gektar. Onyń ishinde 8,7 gektar memlekettik qorda, 2,17 gektar memleket muqtajy úshin 28 menshik ıesinen satyp alynady. Qazir 12 menshik ıesinen 1,0956 gektar jer satyp alyndy. Bul ýchaske yńǵaıly tasymaldaý múmkindigi bar ortalyq qurý úshin ońtaıly alań retinde tańdaldy, — dep habarlady basqarmadan.

Amerıka Qurama Shtattarynyń konsýldyq mekemesi úshin múlde bólek, bos ýchaske bólindi. Ol ál-Farabı dańǵyly (ońtústik) — Seıfýllın dańǵyly (batys) — Aldar Kóse kóshesi (soltústik) — Jamaqaev kóshesiniń shyǵysynda turǵyzylatyn bolady. Jalpy alańy — 7,05 gektar. Kongress ortalyǵyna deıingi araqashyqtyq 300-400 metr.

Budan bólek, jasyl aımaq qurylady. 

— Shekaralary: ál-Farabı dańǵylynyń ońtústigi — Nazarbaev dańǵylynyń batysy. Jalpy alańy — 9,7 gektar. Onyń 6,7 gektary memlekettik qorda, 3 gektar jer memleket muqtajy úshin satyp alynady (92 menshik ıesi), onyń ishinde 6 menshik ıesinen 0,25 gektar jer satyp alyndy, — delingen habarlamada.

Ótemaqy men kepildikter:

— jer telimderin májbúrlep alyp qoıý bólek rásimder arqyly júrgiziledi;
— barlyq taraptyń quqyǵy teń dárejede qamtamasyz etiledi;
— ótemaqy somasy jerdiń naryqtyq qunyna saı, táýelsiz baǵalaýshy kompanııalar arqyly anyqtalady.

Eske salaıyq, osy jyldyń basynda Almatyda AQSh konsýldyǵyna jer telimi beriletini týraly jazǵanbyz. 

Buǵan deıin AQSh-tyń Qazaqstandaǵy elshisi Denıel Rozenblıým elimizdegi mansabyn aıaqtap, zeınetke shyqqan bolatyn.