Almatyda aqyly trotýar turaqtary iske qosylady
Almaty qalasynyń Almaly aýdanynda 11 jeltoqsannan bastap mınýty úshin tólem jasalatyn aqyly trotýar turaǵy jumys isteı bastaıdy, dep habarlaıdy Kazinform.
Almaty ákimdiginiń málimetinshe, Almaly aýdanynda 27 aımaq, 6504 turaq orny, onyń ishinde múmkindigi shekteýli adamdarǵa arnalǵan 454 turaq orny bar.
Aqyly trotýar turaǵynyń jumys tártibi: kún saıyn saǵat 8: 00-den 19:00-ge deıin. Bir saǵattyń quny 100 teńge. Ýaqytty esepteý kólik quralynyń turaq aımaǵynda toqtaǵan sátinen bastalady. Turaq aqysyn alǵashqy 15 mınýt ishinde tóleý qajet.
Turaq orny úshin aldyn ala tóleýdi kelesi tásildermen júrgizý qajet:
- «parkovkı Almaty» mobıldik qosymshasy arqyly. Bul qosymshany Play Market nemese Apple Store arqyly telefonǵa júkteýge bolady;
- almaty-parking.kz saıtynda;
- Kaspi.kz mobıldik qosymshasy arqyly aqparattyq taqtalardaǵy QR-kod boıynsha;
- kassa 24 termınaly;
- Kcell, Activ, Beeline, Tele2, Altel abonentteriniń 1309 nómiri boıynsha SMS habarlama jiberip tóleı alady. Tóleý úshin taqtada kórsetilgen turaq nómirin, kólik nómirin jáne "*" belgisi arqyly saǵat sanyn kórsetý kerek. Mysaly, 6021*123AAA02*1.
"Almatyparkıng" KMK-da ekinshi deńgeıli bankter (Halyk bank, Centercredit, RBK, Jusan jáne Forte bank) arqyly QR-tólemdi yqpaldastyrý arqyly tólem tásilderin arttyrý múmkindikteri belsendi túrde ázirlenip jatqanyn habarlady.
"Trotýar úlgisindegi turaqtar basqa aýdandarda kezeń-kezeńimen iske qosylady. Buzýshylyqtar avtomatty rejımde, mobıldi keshendermen (arnaıy avto) tirkeledi. Aqyly turaq úshin tóleýden jaltarǵany úshin aıyppul 3 AEK quraıdy (QR 597-baby, 4-1-b.). Bir jyl ishinde buzýshylyqtar qaıtalansa, 5 AEK mólsherinde aıyppul tóleýge ákeledi. Almaty qalasynyń aqyly turaq aımaǵynyń shekarasynda kólik quraldaryn tegin qoıý quqyǵyna jeńildik sanaty bar azamattar ıe", - dep habarlady Almaty ákimdiginiń baspasóz qyzmeti.
Ótinishter «eOtinish» servısi arqyly onlaın, Almaty-parking.kz saıty arqyly nemese Almaty qalasy, Bostandyq aýdany, Báıseıitova kóshesi, 40, n.l.71, 5 kabınette qabyldanady.
Baılanys ortalyǵy: +7 (727) 390-8000 kúndelikti saǵat 8:00-den 20:00-ge deıin jumys isteıdi.
