Almatyda aqyly avtoturaqtardyń qyzmetinde qandaı ózgerister bolady
Almatyda aqyly avtoturaqtardy uıymdastyrý qaǵıdalaryna ózgerister men tolyqtyrýlar engizý qarastyrylyp jatyr, dep habarlaıdy Kazinform.
Ákimdiktiń málimetinshe, aqyly kommýnaldyq turaqtarda bos oryndar men basqa da qajetti aqparattar sanyn kórsetetin statsıonarlyq kameralar (foto, beıne tirkeý jáne turaq ýaqytyn esepke alý) jáne elektrondyq qurylǵylardy ornatý qarastyrylady.
Almatyda búgingi kúni kólikterdiń alańdyq turaqtarǵa kirip-shyǵýy shlagbaým júıesimen baqylanady.
«Alańdyq tıptegi avtoturaqtardaǵy kommýnaldyq kásiporyn kedergisiz júıeni uıymdastyrýdy josparlap otyr. Mundaı júıe ótkizý qabiletin arttyrýǵa qyzmet etedi, kirý jáne shyǵý kezegin boldyrmaıdy, avtokólikterdiń turaq aýmaǵyna kirý ýaqytyn qysqartady, sondaı-aq júıe avtokólikterdi avtomatty rejımde tirkeýge múmkindik beredi jáne tólemegen jaǵdaıda aıyppul salady. Ol sonymen qatar ındıkatsııa men bos oryndardy avtomatty túrde sanaýǵa jol ashady», - dep habarlady ákimdiktiń baspasóz qyzmeti.
Sonymen birge qolma-qol aqshasyz esep aıyrysýdy ustaýǵa jáne yńǵaılylyqqa jumsalatyn shyǵystar boıynsha bıýdjetti únemdeý maqsatynda tólem jasaý úshin elektrondyq termınal da alynyp tastalady. Endi QR kod arqyly tez tóleýge bolady jáne ol kúndelikti ómirde qoldanýǵa yńǵaıly bolýy úshin mobıldi qurylǵymen biriktirilgen.
«Avtoturaqtardy uıymdastyrý qaǵıdalarynda kók tústi jol tańbasyn qoldaný josparlanyp otyr. Álemdik tájirıbede kók tústi jol tańbasy aqyly avtoturaqtardyń shekaralaryn belgileý úshin keńinen qoldanylady. Tyǵyz trafık bolǵan kezde jol belgisi baıqalmaı qalýy múmkin, al kók tústi jol tańbasy sózsiz ózine nazar aýdaratyn bolady», - delinedi habarlamada.
Qaýlynyń bul jobasy Qazaqstan Respýblıkasynyń qoldanystaǵy zańnamasyna jáne normatıvtik quqyqtyq aktilerge qoıylatyn talaptarǵa saı. Barlyq múddeli azamat jobany talqylaýǵa 20.12.2023 jylǵa deıin myna silteme boıynsha qatysa alady: https://legalacts.egov.kz/arm/admin/viewcard?id=14828548
