Almatyda adam papılloma vırýsyna qarsy vaktsınatsııa 30 qyrkúıekte bastalady

ALMATY. KAZINFORM — Almatyda adam papıllomasy vırýsyna (APV) qarsy vaktsına salýǵa daıyndyq júrip jatyr.

QR Bas memlekettik sanıtarııa dárigeriniń qaýlysyna sáıkes APV-ǵa qarsy vaktsınatsııa 11 jastaǵy qyzdarǵa, sondaı-aq ımýnıteti kesh damyp kele jatqan 12-13 jastaǵy qyzdarǵa jasalady. 

Qazirgi ýaqytta Almaty qalasy qoǵamdyq densaýlyq saqtaý basqarmasynyń vaktsına qoımasynda 16 900 doza mólsherinde «Gardasıl» vaktsınasy bar.

— Almaty qalasynda APV-ǵa qarsy vaktsınatsııa osy jyldyń 30 qyrkúıeginen bastalady. Vaktsınatsııany qala mektepteriniń medıtsınalyq kabınetterinde egýlerdi júrgizýge ruqsaty bar kóshpeli egý brıgadalarynyń daıyndalǵan medıtsına qyzmetkerleri júrgizedi. Vaktsınatsııalaýǵa daıyndyq aıasynda 11, 12, 13 jasar qyzdardyń ata-analarymen APV-ǵa qarsy vaktsınatsııanyń mańyzy men qajettiligi týraly túsindirý jumystary júrgizilip jatyr, — dedi Almaty qalasynyń sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly.

Sondaı-aq № 4 qalalyq klınıkalyq aýrýhana bazasynda adam papıllomasy vırýsyna qarsy vaktsınatsııa máseleleri boıynsha konferentsııa ótkizildi.

Eske salaıyq, buǵan deıin Almatyda tumaýǵa qarsy 200 myń reseılik vaktsına satyp alynǵanyn jazǵanbyz.