Almatyda 88 zańsyz nysan buzyldy
ALMATY. KAZINFORM – Almatyda 2022 jyldan beri 88 zańsyz nysan buzyldy.
Almatyda ákimdiginiń málimetinshe, qala ákimi Erbolat Dosaevtyń tapsyrmasymen zańsyz qurylysqa baqylaý kúsheıtilip jatyr. 2022 jyldyń basynan 2025 jyldyń mamyryna deıin megapolıste ruqsatsyz salynǵan 88 nysan tolyǵymen nemese jartylaı buzyldy.
– 2025 jyly zańsyz salynǵan 18 ǵımarat súrildi. Olardyń ishinde turǵyn úı keshenderi, ákimshilik ǵımarattar, qosymsha qurylystar, dámhanalar, kólik jýý oryndary bar. Eń iri nysandar qatarynda «Mechta» taýnhaýsy, «KHAN» turǵyn úı keshenderi jáne Dostyq dańǵylyndaǵy 7 qabatty ákimshilik ǵımaraty bar,– dep habarlady ákimdikten.
Taýly aımaqtaǵy zańsyz qurylysqa erekshe nazar aýdaryldy. Munda 38 nysanǵa qatysty sot sheshimi shyqqan, olardyń 12-i tolyq nemese jartylaı buzyldy. 3 nysanda qurylys jumystary bastapqy kezeńde toqtatyldy.
Aıta keteıik, buzý jumystary tek sot sheshimi men tıisti qujattar negizinde, sot oryndaýshylarynyń qatysýymen júrgiziledi.
– Zańsyz qurylysqa baqylaýdy kúsheıtý – qazirgi kúnniń talaby. Qala ınfraqurylymyna, kólik jáne áleýmettik júıege júkteme artyp barady. Ruqsatsyz, beıbereket qurylys tek qalanyń damýyna emes, turǵyndardyń qaýipsizdigine de tikeleı qaýip tóndiredi. Ásirese, taýly aımaqtaǵy qurylysqa erekshe nazar aýdarý qajet. Bul aýmaqtar seısmıkalyq turǵydan álsiz ári qaýipti aımaqtar. Osyndaı jerlerdegi zań buzýshylyqtar óte aýyr saldarǵa ákelýi múmkin. Eń bastysy, barlyq súrý jumysy zań aıasynda sot sheshimimen ǵana júzege asyrylyp jatyr, – dedi ýrbanıst jáne qoǵam qaıratkeri Gúlmıra Baıǵabulova.
Osyǵan deıin Almatyda qurylys nysandaryna baqylaý kúsheıtiletini týraly jazǵan bolatynbyz.
Budan bólek, statsıonarlyq emes zańsyz saýda nysandardyń buzylatyny týraly jazǵan edik.
Qalada 157 statsıonarlyq emes saýda nysandaryn ornalastyrýǵa arnalǵan 142 oryn bekitilgen.