Almatyda 500 keliden astam esirtki tárkilendi

ALMATY. KAZINFORM – Almatyda jyl basynan beri esirtkiniń zańsyz aınalymy salasynda 629 quqyq buzýshylyqtyń joly kesildi. Onyń ishinde 279-y – ótkizý faktileri.

Almaty polıtsııa departamentiniń bastyǵy Aıdyn Qabduldınovtiń málimetinshe, kóleńkeli naryqqa 500 keliden astam esirtki zatynyń túsýine jol berilmedi. Onyń ishinde 54 keliden astamy – sıntetıkalyq zattar. Osylaısha, shamamen 2,5 myń doza esirtki aınalymǵa túspeı, qoǵamnan oqshaýlandy.

Polıtsııa málimetinshe, jumys birneshe baǵytta júrgizilip jatyr. Atap aıtqanda, profılaktıka, tsıfrlandyrý jáne halyqaralyq yntymaqtastyq qamtylǵan. Qazirgi tańda jasandy ıntellekt negizindegi taldaý júıeleri, ushqyshsyz ushý apparattary jáne dáleldemelermen jumys isteýge arnalǵan tsıfrlyq sheshimder keńinen engizilip jatyr. Sondaı-aq esirtki jarnamasyna qarsy kúreske erekshe nazarda.

Eriktiler men beıjaı qaramaıtyn azamattardyń qatysýymen esirtkini nasıhattaıtyn 15 myńnan astam graffıtı joıylyp, 2 myń 900-ge jýyq ınternet-resýrs anyqtalyp, buǵattalǵan. Azamattardyń kómegimen esirtki taratýǵa qatysy bar 92 adam ustalyp, barlyǵy qylmystyq jaýapkershilikke tartyldy.

Aıdyn Kabduldınov sondaı-aq áleýmettik jeliler, messendjerler jáne graffıtı arqyly esirtki taratý úshin múlki tárkilenip, 3 jyldan 6 jylǵa deıin bas bostandyǵynan aıyrý jazasy qarastyrylǵanyn eske saldy.

Sonymen qatar 1 qańtardan bastap azot totyǵynyń aınalymy úshin jaýapkershilik kúsheıtildi. Ol kúshti áser etetin zat retinde tanylyp, zańsyz saqtaý jáne taratý úshin 15 jylǵa deıin bas bostandyǵynan aıyrý jazasy qarastyrylǵan.

Eske salaıyq, buǵan deıin Almatyda eriktilerdiń kómegimen 670 esirtki saıty buǵattalǵanyn jazǵanbyz.