Almatyda — 5 myń, Ulytaýda — 145: Múgedektigi bar adamdarǵa qansha nysan beıimdelgen
ASTANA. KAZINFORM — Múgedektigi bar adamdardyń zańdy quqyqtaryn qamtamasyz etý jáne qoljetimdi orta qalyptastyrý maqsatynda jyl basynan beri Qazaqstanda áleýmettik ınfraqurylymnyń 27 683 nysany tolyqtaı beıimdeldi, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Qazir Qazaqstan Respýblıkasynda 2025–2030 jyldarǵa arnalǵan ınklıýzıvti saıasat tujyrymdamasy, «Amanat» partııasynyń 2023–2027 jyldarǵa arnalǵan Jol kartasy, sondaı-aq Memleket basshysynyń tapsyrmasymen ázirlengen «Halyqpen birge» jobasy iske asyrylyp jatyr.
— «Amanat» partııasynyń Jol kartasynda 2023–2027 jyldar aralyǵynda Qoljetimdiliktiń ınteraktıvti kartasyna (budan ári — Karta) engizilgen 40 myńnan astam nysandy beıimdeý kózdelgen. Jyl saıyn nysandardyń 20%-y beıimdelip otyrady. Osylaısha, 2023 jyly — Kartadaǵy nysandardyń 20%-y, 2024 jyly — 40%, 2025 jyly — 60%, 2026 jyly — 80%, 2027 jyly — 100% beıimdelýi tıis. Jyl sońyna deıin el boıynsha 34 320 nysandy beıimdeý josparlanǵan, 2026 jyldyń eki aıynda 27 683 nysanda beıimdeý jumystary júrgizilip, jalpy sanynyń 65%-yn quraıdy, — delingen mınıstrlik habarlamasynda.
Atalǵan 27 683 nysannyń ishinde múgedektigi bar adamdardyń barlyq sanaty úshin qoljetimdileri:
- densaýlyq saqtaý nysandary — 4 570;
- bilim berý nysandary — 9 083;
- mádenıet nysandary — 2 166;
- saýda jáne qyzmet kórsetý nysandary — 5 314;
- memlekettik jáne kvazımemlekettik uıymdar — 4012;
- ózge de nysandar — 2 538.
Jergilikti atqarýshy organdardyń málimetine sáıkes, óńirler boıynsha beıimdelgen nysandar sany:
- Astana qalasy — 810 nysan;
- Almaty qalasy — 5 780 nysan;
- Shymkent qalasy — 1 401 nysan;
- Abaı oblysy — 872 nysan;
- Aqmola oblysy — 1 265 nysan;
- Aqtóbe oblysy — 898 nysan;
- Almaty oblysy — 1 055 nysan;
- Atyraý oblysy — 1 438 nysan;
- Shyǵys Qazaqstan oblysy — 1 221 nysan;
- Jambyl oblysy — 1 084 nysan;
- Jetisý oblysy — 954 nysan;
- Batys Qazaqstan oblysy — 1 360 nysan;
- Qaraǵandy oblysy — 1 281 nysan;
- Qostanaı oblysy — 1 367 nysan;
- Qyzylorda oblysy — 1 567 nysan;
- Mańǵystaý oblysy — 703 nysan;
- Pavlodar oblysy — 1 158 nysan;
- Soltústik Qazaqstan oblysy — 1 038 nysan;
- Túrkistan oblysy — 2 286 nysan;
- Ulytaý oblysy — 145 nysan.
Birinshi toptaǵy múgedektigi bar Kókshetaý qalasynyń turǵyny Ramazan Muqataevtyń sózinshe, jalpy qala boıynsha múgedektigi bar adamdar úshin jaǵdaı jaqsaryp, barlyq múmkindik qarastyrylýyp jatyr.
— Nysan ıeleri olardy qurylys normalaryna sáıkestendirýge tyrysyp jatyr. Kóptegen kásipker men memlekettik organdar shaǵymdar men usynystardy eskere otyryp, kirý toptaryn aıaqtaıdy. Saýda ortalyqtarynyń qoljetimdiligin qamtamasyz etý mańyzdy, endi olarǵa múgedektigi bar adamdar, ásirese kreslo-arbalarmen qozǵalatyndar kedergisiz bara alady. Mysaly, bizdiń qaladaǵy «RIO» saýda ortalyǵy. M. Ǵabdýllın atyndaǵy murajaıdyń qoljetimdilik deńgeıine jáne kóshpeli kórmelerdi uıymdastyrý múmkindikterine tań qaldym, — dedi ol.
Osyǵan deıin jyl basynan beri múgedektikti belgileýge qatysty 9 myńnan astam ótinim syrttaı formatta qaralǵany málim boldy.