Almatyda 40 qabatty keshenniń qurylysy toqtatyldy

ALMATY. KAZINFORM – Almatyda RAMS Beyond 40 qabatty kesheniniń qurylysy ýaqytsha toqtatyldy. Nysanǵa qatysty qoǵamda daý týdy.

Bul týraly Májilis depýtaty Baqytjan Bazarbek Facebook-tegi paraqshasynda habarlady.

– Búgin biz Almatydaǵy RAMS 40 qabatty ǵımaratynyń qurylys-montajdaý jumystaryn toqtattyq! Meniń reıdim barysynda Qala qurylysyn baqylaý basqarmasy nysanǵa resmı nusqama berdi, - dep jazdy depýtat áleýmettik jelide.

Qala ákimdigi bul aqparatqa qatysty ázirshe resmı túsinik bergen joq.

Eske salaıyq, mamyr aıynyń basynda qurylys kompanııasy RAMS Beyond megajobasyn tanystyrǵan edi. 40 qabatty premıým kópfýnktsıonaldy keshenge lıýks rezıdentsııalar, qonaqúı, bıznes-keńistikter jáne áleýmettik aımaqtar kirýge tıis bolatyn. Qurylysy Tımırıazev kóshesi men Seıfýllın dańǵylynyń qıylysynda bastalǵan.

Alaıda joba qala turǵyndaryn alańdatyp qoıdy, sebebi Almatynyń bul bóliginde bıiktikke qatysty shekteýler bar.

Buǵan deıin Májilis depýtaty Sergeı Ponomarev ta záýlim ǵımarattyń salynýyna qarsy shyqqan edi.

Jazda qala ákimdigi 40 qabatty ǵımarattyń qurylysyna qatysty túsinik berdi.