Almatyda 40-qa jýyq taldy syndyrǵan kúdikti ustaldy

ALMATY. KAZINFORM – Megapolıstiń Úlken Almaty ózeniniń boıynda, Tóle bı men Raıymbek dańǵyldarynyń arasynda 40-qa jýyq taldy syndyrǵan kúdikti ustaldy. Orman qoryna kiretin jáne kesýge tyıym salynǵan kóshetterdiń zaqymdalýyna qatysty qyzmet kórsetýshi kompanııanyń ókili aryz bergen.

– Qazirgi tańda aǵashtardyń zaqymdalýyna qatysty qylmystyq is tergelip jatyr. Aryzdanýshynyń aıtýynsha, tekserý kezinde 36 dana kóshet zaqymdanǵan. Atap aıtqanda: katalpa – 15 dana, akatsııa – 7 dana, qaraǵash – 14 dana. Osy qylmysty jasady degen kúdikpen 27 jastaǵy jigit ustaldy. Ol buzaqylyq maqsatynda aǵashtardy syndyrǵanyn aıtty. Kúdikti ýaqytsha ustaý ızolıatoryna ornalastyryldy. Іs sotqa jiberiletin bolady, - dedi Áýezov aýdandyq polıtsııa basqarmasynyń bastyǵy Ulan Ábilqaıyr. 

Eske salaıyq, buǵan deıin Almatyda kólikti mas kúıinde basqarǵan 1,5 myń adam jazalanǵanyn jazǵanbyz.