Almatyda 4 medıtsınalyq nysan jańa standartpen salynyp jatyr
Almatyda medıtsınalyq-sanıtarlyq alǵashqy kómek kórsetetin 4 ortalyq salynyp jatyr, taǵy 11-niń qujattamasy ázirlenýde. Bul týraly qala ákimi Erbolat Dosaev málim etti, dep habarlaıdy Kazinform.
Sapany jaqsartý úshin 2023 jyly medıtsınalyq-sanıtarlyq alǵashqy kómek kórsetýdiń biryńǵaı standartyn engizý bastaldy.
«Jańa standarttar boıynsha 2 medıtsınalyq-sanıtarlyq alǵashqy kómek kórsetý ortalyǵy men 1 emhana ashyldy. Taǵy 4 medıtsınalyq-sanıtarlyq alǵashqy kómek kórsetý ortalyǵy salynyp jatyr. Sondaı-aq 11 ortalyq pen emhanalar qurylysyna jobalaý-smetalyq qujattama ázirlenýde», - dedi E. Dosaev búgin Ortalyq kommýnıkatsııalar qyzmetinde ótken baspasóz brıfınginde.
Qalada 4 jańa statsıonar salýǵa, 5 aýrýhana men jedel medıtsınalyq kómektiń 5 shaǵyn stantsııasyn modernızatsııadan ótkizýge jobalaý-smetalyq qujattama daıyndalyp jatyr.
«Sonymen birge kadrlyq áleýetti arttyrý úshin 3 340 dárigerimiz respýblıkanyń ǵylymı ortalyqtary men Germanııa, Izraıl, Túrkııa klınıkalary bazasynda qaıta daıarlaýdan ótti. Rezıdentter úshin 136 grant, orta medıtsınalyq personal úshin 1 116 grant jergilikti bıýdjetten bólingen. Jalpy, densaýlyq saqtaý salasyn qarjylandyrý 2023 jyly 36,5 mlrd teńgeden 2024 jyly 41 mlrd teńgege deıin ulǵaıady», - dep túsindirdi E. Dosaev.
Aıta keteıik, Erbolat Dosaev elordada Almaty qalasynyń áleýmettik-ekonomıkalyq damýy týraly esep berýde.
Buǵan deıin qala ákimi Almatyda dızelmen júretin avtobýs satyp alýǵa tyıym salynýy múmkin ekenin aıtqan edi. Sondaı-aq megapolıs mektepterinde oryn tapshylyǵy qashan azaıatynyn aıtty.
