Almatyda 26 qaıyrymdylyq mekeme lıtsenzııasynan aıyryldy
ALMATY. KAZINFORM — Almaty qalasynyń mamandandyrylǵan aýdanaralyq ekonomıkalyq sotynyń sheshimimen «Jibek joly» qaıyrymdylyq mekemeleri qaýymdastyǵyna kiretin 26 tulǵanyń memlekettik tirkeýi joıylyp, qyzmeti toqtatyldy.
Joǵarǵy sot málimetinshe, ýákiletti organ tekserisiniń qorytyndysy boıynsha Almaty qalasynda qaıyrymdylyqpen jáne bilim berý salasyndaǵy qyzmetpen aınalysatyn 26 mekemeniń tek 11-i naqty jumys istegen, al 15-i tirkelgen jerinde joq ekeni anyqtalǵan.
Olardyń qatarynda «Ana Amanaty» qyzdar mektep-ınternaty, «AMANAT áleýmettik balalar úı-ınternaty», «Almaly» áleýmettik balalar úıi-ınternaty, «Saýran-Islam mádenı ortalyǵy» jáne taǵy basqa qaıyrymdylyq uıymdary bar.
«Mekemelerde balalardyń ómiri men densaýlyǵyna tikeleı baılanysty, sonyń ishinde kóshi-qon, eńbek, jer, ekologııa jáne turǵyn úı máselelerine qatysty óreskel zań buzýshylyqtar oryn alǵan. Sondaı-aq sáýlet, qala qurylysy jáne qurylys qyzmeti, órt qaýipsizdigi talaptary, sanıtarlyq-epıdemıologııalyq normalar, dinı, qaıyrymdylyq jáne qarjylyq-sharýashylyq qyzmet salalarynda buzýshylyqtar anyqtaldy»,- dep habarlady sottan.
Іs júzinde mekemelerdiń jumysy olardyń jarǵylyq maqsattaryna qaıshy keledi. Onyń ústine, olardyń keıbireýleri bilim berý qyzmetin tıisti lıtsenzııasyz júzege asyrǵan. Balalardyń tıisti bilim, tárbıe jáne der kezinde medıtsınalyq kómek alý quqyqtary men bostandyqtary aıtarlyqtaı buzylǵan.
Qaıyrymdylyq mekemeleriniń dinı kózqarasy rastalyp, QR Musylmandary dinı basqarmasynyń «Jibek joly» mekemesimen memorandýmy birjaqty tártipte toqtatylǵan. Zań normalaryn buzǵan atalǵan mekemelerdiń birqataryna jáne olardyń basshylaryna qatysty qylmystyq is qozǵalǵan (kámeletke tolmaǵannyń óz-ózine qol jumsaýy, kámeletke tolmaǵan balany tárbıeleý jónindegi mindetterdi oryndamaý, áleýmettik, ulttyq, násildik jáne dinı arazdyqty qozdyrý, sotpen ekstremıstik jáne terrorıstik dep tanyǵan ádebıetterdi tabý).
Osyǵan oraı, birinshi satydaǵy sot talap qoıýdy tolyq qanaǵattandyrdy.
«Almaty qalasynyń mamandandyrylǵan aýdanaralyq ekonomıkalyq sotynyń sheshimimen 26 qaıyrymdylyq mekemesiniń memlekettik tirkeýi joıylyp, qyzmeti toqtatyldy»,- dep atap ótti sottan.
Apellıatsııa bul sheshimdi kúshinde qaldyrdy.
