Almatyda 250 myńnan astam zeınetker turady

ALMATY. KAZІNFORM – 2024 jyly Almatynyń belsendi uzaq ómir súrý ortalyqtaryna 6073 adam keldi. Al, kórsetilgen qyzmet kólemi 313 myń teńgege deıin ósti. Bul týraly óńirlik kommýnıkatsııalar qyzmetiniń alańynda ortalyq basshysy Sáýle Beketaeva málimdedi.

Spıkerdiń sózinshe, ardagerler men zeınetkerlerge qamqorlyq jasaý, olardyń shyǵarmashylyq jáne áleýmettik ózin-ózi júzege asyrýy úshin jaǵdaı jasaý, sondaı-aq paıdaly bos ýaqytty uıymdastyrý - áleýmettik saıasattyń mańyzdy basymdyqtarynyń biri.

– Qazaqstan tarıhynda tuńǵysh ret ortasha ómir súrý uzaqtyǵy rekordtyq kórsetkishke jetti – 74,44 jas, al Almatyda ol 78 jasty quraıdy, bul eldegi eń joǵary kórsetkish. Megapolıste jalpy 250 myńnan astam zeınetker turady.

Ortalyqtar bilim berý baǵdarlamalary men trenıngterden bastap deneshynyqtyrý, ıoga, bı jáne shyǵarmashylyq sheberhanalarǵa deıin 40-tan astam tegin qyzmet túrin usynady. Egde jastaǵy azamattar arasynda «Aıkýne» ulttyq jattyǵýlary, keskindeme kýrstary, hor, qolóner jáne agroterapııa erekshe tanymal. 2024 jylǵy málimetter boıynsha, kelýshiler arasyndaǵy depressııa deńgeıi 50% – ǵa, al jalǵyzsyraý 55% - ǵa tómendedi. Qatysýshylardyń 70% - dan astamy jalpy densaýlyqtyń, kóńil kúıdiń jáne belsendiliktiń jaqsarǵanyn aıtady,– dedi Sáýle Beketaeva.

Jyl saıyn qyzmetter men kelýshiler sany arttyp jatyr. 2022 jyly 833 adam qyzmet alsa, 2024 jyly olardyń sany 6 073-ke deıin jetti, al kórsetilgen qyzmetter kólemi sol kezeńde 12 myńnan 313 myńǵa deıin ósti.

– Sondaı-aq, ortalyqtardyń qatysýshylary shyǵarmashylyq alańdarda ózderin belsendi kórsetedi. «Aınalaıyn» ansambli halyqaralyq óner baıqaýynda gran-prı jeńip aldy, al «Almaty ájeleri» egde jastaǵy modelder jobasy Italııadaǵy sán aptalyǵynda Qazaqstandy tanystyryp shyqty. Kórmeler, teatr qoıylymdary men kontsertter uıymdastyrylyp turady,– deıdi spıker.

Ulttyq statıstıka bıýrosynyń dereginshe, byltyr el halqynyń sany 20 mln-nan asqan.