Almatyda 25 aqpanda dabyl sırenalary iske qosylady

ALMATY. KAZINFORM — 25 aqpanda saǵat 11:00–de qalalyq tótenshe jaǵdaılar qyzmeti «Kóktem-2026» respýblıkalyq oqý-jattyǵýy aıasynda halyqty qulaqtandyrý júıesine tehnıkalyq tekserý júrgizedi. 

Tekserý kezinde «Barlyǵyńyzdyń nazaryńyzǵa!» dabyl sıgnaly boıynsha qala aýmaǵyndaǵy sırenalar az ýaqytqa qosylady. Sondaı-aq synaq habarlamasyn taratý úshin tele jáne radıoarnalardy ýaqytsha toqtatý júıesi iske qosylady.

Almaty tótenshe jaǵdaılar departamenti turǵyndarǵa sabyr saqtaýdy eskertti.

— «Barlyǵyńyzdyń nazaryńyzǵa!» sıgnaly — tótenshe jaǵdaı qaýpi tóngen nemese týyndaǵan kezde shuǵyl aqparat taratar aldynda halyqtyń nazaryn aýdarý úshin beriletin eskertý belgisi, — delingen habarlamada.

Turǵyndar dybystyq sıgnaldy estigen kezde teledıdardy nemese radıoqabyldaǵyshty qosýy, resmı ınternet-resýrstar men mobıldi qoldanbalardaǵy aqparatpen tanysýy jáne usynylǵan nusqaýlarǵa muqııat baǵynýy kerek.

Sonymen qatar 25-26 aqpanda qalanyń ár aýdanynda ózen arnalary men aryq júıelerin tazalaý boıynsha profılaktıkalyq is-sharalar júrgiziledi. Qazirgi ýaqytta sý tasqyny jaǵdaıy baqylaýda, qalanyń jedel qyzmetteri aldyn ala qajetti profılaktıkalyq sharalardy atqardy.

Vedomstvonyń málimetinshe, maýsymdyq ózgerister negizinen qalyń jaýyn-shashyn men kóktemgi qardyń erýine baılanysty, bul Almaty úshin qalypty qubylys bolyp esepteledi. Sý tasqyny kezeńine daıyndyq aıasynda qala aýmaǵynan 150 myń tekshe metrge jýyq qar shyǵaryldy.

Eske salaıyq, buǵan deıin Almaty ekologııa jáne qorshaǵan orta basqarmasy basshysynyń orynbasary Arshat Baqtygereev qalada sý tasqyny bolady dep alańdaýǵa negiz joq ekenin, turǵyn úı sektory men ınfraqurylym nysandaryn kóktemde sý basatyn qaýip te edáýir azaıǵanyn aıtqan edi.