Almatyda 2025 jyly kimder joǵalyp ketti

ALMATY. KAZINFORM – Almaty polıtsııa departamenti Kazinform agenttiginiń resmı saýalyna bergen jaýabynda qalada byltyr joǵalǵan adamdardyń sany, jynysy, jas ereksheligi jáne tiri nemese qaıtys bolǵan jaǵdaılary týraly derekterdi usyndy.

Almatyda 2025 jyly azamattardyń habar-osharsyz joǵalý faktileri boıynsha 239 aryz tirkelgen. Qalalyq Polıtsııa departamentiniń málimetinshe, onyń aldyńǵy jyldary joǵalǵandardy qosa alǵanda, byltyr tiri tabylǵandar sany 4 402 adam bolǵan.

– Onyń ishinde er adamdar – 2 519, al áıel adamdar – 1 883. Sonymen qatar 12 adamnyń máıiti anyqtaldy, - delingen resmı jaýapta.

Polıtsııa ókilderi máıiti tabylǵan adamdardyń arasynda kisi qolynan qaza tapqandar joq ekenin rastady. Joǵalǵandardyń jas ereksheligi boıynsha statıstıkaǵa qaraǵanda, kámeletke tolmaǵandar 10-15 jas aralyǵynda, al eresekter 35-60 jas aralyǵynda ornalasqan. Joǵalǵandar arasyndaǵy er adamdardyń úlesi joǵary.

Polıtsııanyń resmı ókili Saltanat Ázirbektiń aıtýynsha, kóp jaǵdaıda joǵalý faktileriniń negizgi sebebi – turmystyq janjal. Kámeletke tolmaǵan balalar keıde ata-anasymen urysyp, úıden ketse, eresek adamdardyń ishinde jubaıymen túsinispeýshilik bolǵan jaǵdaıda habarsyz ketý jaǵdaılary tirkelgen.

Eske salaıyq, buǵan deıin Atyraý oblastyq Polıtsııa departamenti Jangeldın aýylynda joǵalǵan otbasy músheleri Meıramgúl Qarabalına men Naýryz Muqanǵalıevty izdeý jumysy toqtaldy degen aqparatty joqqa shyǵarǵan edi.

Іzdeý tek azamattar tabylǵan kezde toqtaıdy. Sondyqtan izdestirý jumysy áli jalǵasyp jatyr.