Almatyda 2025 jylǵy bıýdjetke túzetý engizildi
ALMATY. KAZINFORM — Almatyda 2025 jylǵa arnalǵan qalalyq bıýdjettiń naqtylanǵan nusqasy tanystyryldy. Bul másele Máslıhattyń XXXVIII sessııasynda qaralyp, depýtattar túzetýlerdi maquldady.
Almaty ekonomıka jáne qarjy basqarmasynyń basshysy Baýyrjan Qudaıbergenovtyń aıtýynsha, túzetý osy jylǵy qarjy nátıjelerine sáıkes bıýdjet qarajatyn tıimdirek bólýge múmkindik beredi.
Memlekettik satyp alýlardyń nátıjesinde 19,5 mlrd teńge kóleminde qarajat únemdelgen. Osyǵan baılanysty shyǵyndardyń keıbirin qysqartý usynyldy. Sonymen birge birneshe jobanyń kezeń-kezeńimen iske asyrylýyna jáne keıbir sharalardyń kelesi jylǵa aýystyrylýyna baılanysty 200 mlrd teńgeni qaıta bólý josparlanyp otyr.
— Bul shyǵyndardy azaıtý degendi bildirmeıdi. Qarjylandyrý tek naqty oryndalǵan jumystar boıynsha rastalǵan aktiler negizinde júrgiziledi. Bul bıýdjet qarajatynyń maqsatty ári sapaly ıgerilýine múmkindik beredi, — dedi Baýyrjan Qudaıbergenov.
Jospardan buryn oryndalyp jatqan jobalarǵa der kezinde tólem júrgizý úshin qosymsha 73,4 mlrd teńge bólý qajettigi týǵan.
Premer-mınıstrdiń turaqtandyrý qorlaryn qarjylandyrýdy eki eseleý jáne áleýmettik mańyzy bar azyq-túlik qataryn keńeıtý jónindegi tapsyrmasyna sáıkes, jergilikti bıýdjetten qor uıymdaryn nesıeleý úshin 8 mlrd teńge bólý usynyldy. Bul baǵany ustap turýǵa múmkindik beredi.
Bul sharalar azyq-túlik qaýipsizdigin nyǵaıtýǵa, ınflıatsııa deńgeıin tómendetýge jáne tutynýshylar úshin baǵanyń qoljetimdi bolýyn qamtamasyz etýge baǵyttalǵan.
Quramys shaǵyn aýdanynda salynyp jatqan emhananyń qurylysyn jalǵastyrýǵa 700 mln teńge baǵyttalmaq. Bul qarajat nysandy 2026 jylǵy tamyzda ýaqytynda paıdalanýǵa berý úshin kerek.
Sondaı-aq Rahat–Mádenıet jáne Boraldaı shaǵyn aýdandaryndaǵy jol qurylysyn aıaqtaý úshin 1,8 mlrd teńge bólý qarastyrylǵan.
Qala ishindegi baǵyttar boıynsha jolaýshylar tasymalyn sýbsıdııalaýǵa 10 mlrd teńge bólý máselesi qaralyp jatyr.
Eske salaıyq, buǵan deıin Memleket basshysy salyq-bıýdjet úderisterin jetildirýge qatysty birqatar usynys aıtqanyn jazǵanbyz.