Almatyda 200-den astam adam koronavırýs juqtyrǵan

ALMATY. KAZINFORM - Almaty qalasynda koronavırýs ınfektsııasy boıynsha epıdemıologııalyq jaǵdaı turaqty.

Almaty qalalyq Sanıtarııalyq-epıdemıologııalyq baqylaý departamentiniń málimetinshe, jyl basynan 18 aqpanǵa deıin qala turǵyndary arasynda KVI-diń zerthanalyq rastalǵan 233 jaǵdaıy anyqtaldy. Onyń ishinde 14 jasqa deıingi balalar arasynda - 30 jaǵdaı, jasóspirimder arasynda - 6 jaǵdaı, eresekter arasynda - 197 jaǵdaı tirkeldi.

Tirkelgen 233 jaǵdaıdyń ishinen: ózdiginen qaralǵandar – 202 jaǵdaı (86,7%); profılaktıkalyq maqsatta – 18 (7,7%); epıd kórsetkishter boıynsha – 13 jaǵdaı (5,6 %).

Sondaı-aq jyl basynan beri KVI juqtyrǵan adamdardyń jas quramy boıynsha:

- 1 jasqa deıingi balalar - 21 jaǵdaı tirkelgen, úles salmaǵy – 9,0%;

- 14 jasqa deıin-30 jaǵdaı, úles salmaǵy – 12,9%;

- 15-19 jas aralyǵyndaǵy jasóspirimder men jasóspirimder arasynda - 10 jaǵdaı tirkeldi, úles salmaǵy – 4,3%;

- 20-39 jastaǵy azamattar – 83 jaǵdaı, 35,6%;

- 40-59 jastaǵy azamattar – 37 jaǵdaı, 15,9%;

- 60 jas jáne odan joǵary – 73 jaǵdaı, 31,3%.

Jyl basynan beri 18 aqpanǵa deıin KVI men aýyrǵandardyń ishinde kásibi boıynsha juqtarǵandar: 27,9% - jumyssyzdar, 15,0% - ártúrli JShS - de jumys isteıtinder, 11,6% – mektep jasyna deıingi balalar, 27,5% - zeınetkerler, 3,9% - stýdentter.

Qalalyq Sanıtarııalyq-epıdemıologııalyq baqylaý departamenti koronavırýs ınfektsııasynyń aldyn alý sharalaryn eske saldy.

«Koronavırýs ınfektsııasynan qorǵanýdyń jalǵyz joly vaktsınatsııa ekenin este ustaǵan jón. KVI-di juqtyrýdyń aldyn alý úshin qorǵanys maskalaryn qoldaný, adamdar kóp jınalatyn jerge barýdan jáne temperatýrasy joǵary naýqastarmen baılanysta bolýdan bas tartý usynylady. Aýrýdyń aldyn alý úshin úı-jaılardy únemi jeldetip otyrý, dymqyl tazalaý, sondaı-aq jeke gıgıena erejelerin saqtaý kerek ( qoldy jıi jýý, antıseptıkterdi qoldaný jáne t.b.). Eger respıratorlyq aýrýlardyń belgileri paıda bolsa, maska kıip, dereý medıtsınalyq kómekke júginý kerek», - dep eskertti vedomstvodan.