Almatyda 20 jańa kitaphana ashylady
ALMATY. KAZINFORM – Almatyda 2030 jylǵa deıin taǵy 20 jańa kitaphana ashylady. Bul rette kitaphana tapshylyǵy baıqalatyn qalanyń shalǵaı aýdandaryna aıryqsha mán beriledi. Sonymen qatar saıabaqtarda, skverler men saýda ortalyqtarynda kitaphana pavılondary men apparattary paıda bolady.
Qazir qala ákimdigine qarasty 28 kitaphana bar. Onyń úsheýi táýlik boıy jumys isteıdi. Oqyrmandar úshin barlyq kitaphanada qolaıly jaǵdaı jasalǵan: kitap qory únemi jańartylyp otyrady, tegin wi-fi jumys isteıdi, kompıýterler ornatylǵan, jańa jumys ústelderi, dıvandar men pýfıkter syndy jıhazben qamtylǵan.
Sonymen qatar birneshe kitaphanada kórý qabileti nashar nemese zaǵıp oqyrmandarǵa arnalǵan Braıl pernetaqtalary da ornatylǵan. Braıl júıesiniń qozǵalmaly núkteleri arqyly zaǵıp oqyrman kitap mátinin saýsaqpen sezip oqı alady. Ol úshin kez kelgen kitaptaǵy mátindi arnaıy qurylǵy arqyly skanerlep, kompıýter ekranyna úlkeıtip shyǵarady. Sondaı-aq mátindi qulaqqappen aýdıo retinde tyńdaýǵa da bolady.
«Biz qalamyzdaǵy zaǵıptar qoǵamymen, sondaı-aq túrli ınklıýzıvti uıymdarmen tyǵyz yntymaqtastyq ornatyp jatyrmyz. Sonymen qatar balalardyń kitap oqýǵa degen yntasyn arttyrý boıynsha jumystardy belsendi júrgizip kelemiz. Ol úshin tegin til úıirmelerin, geımıfıkatsııa elementteri bar túrli is-sharalar uıymdastyramyz, tipti juldyzdar men jazýshylardy shaqyryp, ádebı keshter ótkizemiz. Bizde barlyǵy 140 tegin úıirme bar. Jalpy, qalalyq kitaphanalardyń 95%-y jańǵyrtýdan ótti. Osynyń arqasynda qalalyq kitaphanalarǵa oqyrmandar jyl saıyn kem degende 3 mln ret kelip-ketedi», - dep atap ótti Almaty qalasynyń ortalyqtandyrylǵan kitaphana júıesiniń dırektory Meıram Bektembaev.
Ortalyqtandyrylǵan kitaphana júıesiniń kitap qory 1 300 000 danadan asady, onyń 18%-y tsıfrlandyrylǵan. Sonymen qatar kitaptar katalogy OKJ saıtynda ornalastyrylǵan jáne qoljetimdi. Sondaı-aq qazirgi ýaqytta múmkindigi shekteýli azamattar úshin úıge kitap jetkizý qyzmeti synaqtan ótip jatyr.
Bıyl Almaty kitaphanashylary Shveıtsarııa, Germanııa, Japonııa, Ońtústik Koreıa jáne Grýzııanyń jetekshi kitaphanalarynda biliktiligin arttyryp, oqýdan ótti.
«Qala basshysy men mádenıet basqarmasy bizdiń salamyzdy damytýǵa qatysty máselelerge aıtarlyqtaı kóńil bóledi. Ásirese – qyzmetkerlerdiń biliktiligin arttyrý, jumysqa qolaıly jaǵdaı jasaýǵa erekshe mán berip keledi. Biz alǵash ret álemniń jetekshi bilim berý ortalyqtary men kitaphanalarynda oqýǵa múmkindik aldyq. Men ózim Ońtústik Koreıada taǵylymdamadan óttim. Shetelde alǵan bilimimiz ben jańa ıdeıalarymyzdy qalalyq kitaphanalarǵa engize bastadyq. Bul rasynda keremet nátıje», - deıdi № 10 kitaphana meńgerýshisi Nadejda Ten.
Qazir qalalyq kitaphanalarda avtomattandyrylǵan aqparattyq-kitaphanalyq júıe iske qosyldy. Bul júıeni engizý arqyly birqatar jańa múmkindik paıda boldy. Máselen, elektrondyq oqyrman bıletin shyǵaryp berý, oqyrmandardyń suranystaryn óńdeý, qajetti ádebıetterdi irikteý, tapsyrys berý jáne rezervteý, kitaptardy avtomattandyrylǵan rejımde berý jáne qaıtarý, kitaphanalyq-aqparattyq tehnologııalardy keshendi avtomattandyrý.
