Almatyda 2 jylda jasyl jelektiń jaǵdaıy zertteýden ótedi
ALMATY. KAZINFORM — Almatyda jyl saıyn 320 myńdaı aǵash pen buta otyrǵyzý kózdelgen.
Kazinform tilshisi Almaty qalasy ekologııa jáne qorshaǵan orta basqarmasyna saýal joldap, megapolıstiń «jasyl qala» ataǵyn qaıtarý úshin qandaı jumys istelip jatqanyn surady.
Vedomstvo málimetinshe, Memleket basshysynyń «Jańa rekreatsııalyq aımaqtar qurý jáne ózen arnalary boıyn kógaldandyrý arqyly 2,5 mıllıon jasyl jelek otyrǵyzý» jónindegi tapsyrmasyn iske asyrý maqsatynda 2030 jylǵa deıingi Jol kartasy bekitilgen. Bul jospar boıynsha qalada jyl saıyn 320 myńnan kem emes aǵash pen buta otyrǵyzý kózdelgen. Sondyqtan 2023 jyly 323 myń aǵash, 2024 jyly 320 myń kóshet otyrǵyzylǵan.
— Bıyl bıiktigi 4–6 metr bolatyn iri ólshemdi aǵashtar otyrǵyzylady. Mundaı aǵashtar birden áserli kórinis berip, alǵashqy jyldary-aq jetilgen, turaqty ekojúıe qalyptastyrady. 2023 jyly qabyldanǵan Almaty qalasynyń jasyl jelekterin ustaý jáne qorǵaý qaǵıdalaryna sáıkes, kóshetterdiń sapasyna jáne sýarý júıesiniń uıymdastyrylýyna qoıylatyn talaptar belgilengen. Merdiger uıymdar japyraqty aǵashtardy keminde 2,5 m, al qylqan japyraqty aǵashtardy keminde 2 m bıiktikte, tabıǵı topyraq komymen otyrǵyzýǵa mindetti, — dep habarlady basqarmadan.
Kógaldandyrý jumystary negizinen ózender men sý qoımalary boıynda, avtomagıstraldar jıeginde jáne jalpy paıdalanýdaǵy bos aýmaqtarda júrgiziledi. Vedomstvo jaýabyna sáıkes, kóbine ekologııalyq máselesi órshigen — JEO sanıtarlyq-qorǵaý aımaǵy, «Batys» zıraty jáne qaladaǵy ındýstrıaldy aımaqtarǵa erekshe nazar aýdarylady.
Dendrologııalyq jospar ázirlenedi
Odan bólek Almaty qalasynyń Ekologııa jáne qorshaǵan ortany qorǵaý basqarmasy qaladaǵy jasyl jelekterdi túgendeý jáne orman patologııalyq zertteý jumystaryn bastap ketkenin habarlady. Atap aıtqanda, ár aýdan boıynsha dendrologııalyq jospar ázirlenbek. Jobanyń merzimi — 2025–2026 jyldar. 2025 jyly Almaly, Alataý, Jetisý jáne Túrksib aýdandary qamtylady. 2026 jyly — Medeý, Bostandyq, Áýezov jáne Naýryzbaı aýdandary.
— Baǵdarlamanyń maqsaty — qaladaǵy jasyl jelekterdiń qazirgi jaı-kúıin keshendi baǵalap, kútim sharalary boıynsha naqty usynystar men is-sharalar josparyn ázirleý. Bul qatarǵa aǵashtardy qyrqý, emdeý, qýraǵan nemese aýrý aǵashtardy kesý jáne jańa otyrǵyzý ýchaskelerin anyqtaý jatady, — delingen vedomstvo jaýabynda.
Ekologııa basqarmasy jasyl jelek 2018–2019 jyldary sońǵy ret túgendeýden ótkenin, alaıda qalanyń jyldam damýyna jáne Almaty qalasynyń 2024 jylǵa deıingi Bas josparynyń qabyldanýyna baılanysty burynǵy málimetter ózektiligin joǵaltqanyn atap ótti. Sondyqtan orta merzimdi (5–10 jyldyq) kógaldandyrý strategııasyn anyqtaý úshin jańa dendrologııalyq jospar ázirleý qajet.
— Sonymen qatar qoǵamdyq uıymdar men aýdandyq ákimdikterdiń mamandarymen birlese otyryp, aǵashtardyń jersiný deńgeıi, densaýlyǵy jáne ósýine áser etetin faktorlar boıynsha júıeli túrde tekserý júrgiziledi. Mundaı tásil sý tapshylyǵy, zııankester nemese aýrýlar sııaqty táýekelderdi erte anyqtap, olardy joıý úshin jedel sharalar qabyldaýǵa múmkindik beredi, — delingen ekologtar jaýabynda.
Eske salaıyq, Almatyda qoǵamdyq keńistikti kógaldandyrýǵa tegin kóshet berilgen.