Almatyda 2 esirtki zerthanasy men iri qoıma joıyldy
ASTANA. KAZINFORM — 2025 jylǵy mamyrda Almaty qalasynda Ulttyq qaýipsizdik komıteti prokýratýra organdarynyń úılestirýimen 2 esirtki zerthanasy men prekýrsorlary bar iri qoımany joıdy.
Esirtki zattaryn daıyndaý kezinde QR 3 azamaty ustaldy. Olarǵa qatysty sot sanktsııasymen qamaýǵa alý túrindegi bultartpaý sharasy qoldanyldy.
15 kg-dan astam «mefedron» psıhotropty zaty men 650 lıtr prekýrsor, sondaı-aq esirtki zattaryn daıyndaýǵa arnalǵan zerthanalyq jabdyq anyqtalyp, tárkilendi.
UQK baspasóz qyzmeti Qylmystyq kodekstiń 297-baby boıynsha sotqa deıingi tergep-tekserý júrgizilip jatqanyn málimdedi.
Ózge aqparat Qylmystyq-protsestik kodekstiń 201-babynyń 1-bóligine sáıkes jarııa etýge jatpaıdy.
Aıta keteıik, Petropavlda asa iri kólemdegi esirtkimen ustalǵan astanalyqqa baılanysty tergeý bastaldy.