Almatyda 199 myńnan astam stýdent bilim alyp jatyr
ALMATY.KAZINFORM – Almaty — Qazaqstannyń eń iri stýdenttik ortalyǵy, onda 199 myńnan astam stýdentti oqytatyn 35 JOO bar. Onyń 124 myńnan astamy — ózge qalalardan kelgender. Bul týraly Almaty qalasynyń Óńirlik kommýnıkatsııalar qyzmetiniń alańynda Almaty Students Week aktsııasynyń bastalýyna arnalǵan baspasóz konferentsııasynda aıtyldy.
Negizgi spıkerler retinde Almaty qalasy Jastar saıasaty basqarmasynyń jastardy áleýmettendirý jáne jastar bastamalaryn qoldaý bóliminiń basshysy Nursultan Bekqaıyrov jáne Qazaq ulttyq qyzdar pedagogıkalyq ýnıversıtetiniń stýdenttik ombýdsmeni Nurbaqyt Álibek qatysty.
Nursultan Bekqaıyrov atap ótkendeı, jyl saıyn, 17 qarashada búkil álemde 1946 jyly Dúnıejúzilik stýdentter kongresinde qurylǵan Halyqaralyq stýdentter kúni atap ótiledi. Osy kún qarsańynda, 11-17 qarasha aralyǵynda Almaty qalasynyń Jastar saıasaty basqarmasy Almaty Students Week festıvalin ótkizedi.
«Festıvaldiń maqsaty - stýdentter úshin belsendi jáne qoldaýshy orta qurý, talantty jastar men bolashaq pikir kóshbasshylaryn anyqtaý. Festıval sonymen qatar ýnıversıtetaralyq ózara is-qımyldy nyǵaıtýǵa jáne ártúrli fakýltetter men oqý oryndarynyń stýdentteri arasynda dostyq jáne iskerlik baılanystar qurýǵa baǵyttalǵan. Bilim men ıdeıalarmen almasýǵa arnalǵan mundaı platforma kásipqoılardyń jańa býynyn qalyptastyra otyryp, birlesken jobalar men bastamalar úshin negiz bola alady», - dep atap ótti Nursultan Bekkaıyrov.
«Almaty Students Week» negizgi aspektisi - stýdent jastardyń birligi jáne patrıottyq rýhyn tárbıeleý. Festıval aıasynda 17 myńnan astam jasty qamtıtyn 30 túrli is-shara ótedi.
«Almaty Students Week» — bul jaı ǵana mereke emes, qazirgi zamanǵy syn-qaterlerdi sheshýge daıyn jáne eldiń damýyna eleýli úles qosa alatyn neǵurlym belsendi jáne uıymshyl stýdentter qaýymdastyǵyn qurý jolyndaǵy mańyzdy qadam», - dep qorytyndylady Qazaq ulttyq qyzdar pedagogıkalyq ýnıversıtetiniń stýdenttik ombýdsmeni Nurbaqyt Álibek.
Eske sala keteıik, buǵan deıin stýdentterdi áskerge tartýdyń tártibi ózgeretinin jazǵan bolatynbyz.
