Almatyda 1908 jylǵy kóne ǵımarat nege buzylyp jatyr
ALMATY. KAZINFORM – Almaty ákimdigi qalada buzylyp jatqan eski ǵımaratqa qatysty qoǵamda taraǵan pikirlerge túsinik berdi.
Keıingi kúnderi BAQ pen áleýmettik jelilerde Almatydaǵy «tarıhı ǵımarat buzylyp jatyr» degen aqparat tarady. Alaıda qalalyq bılik bul nysannyń tarıhı eskertkish mártebesi joq ekenin málimdedi.
Qalalyq memlekettik aktıvter basqarmasynyń dereginshe, Gogol kóshesi, 45 mekenjaıynda ornalasqan eki qabatty ǵımarat 1908 jyly salynǵanymen, ol tarıh jáne mádenıet eskertkishteriniń tizimine engizilmegen. Sondaı-aq nysanǵa tarıhı-mádenı mura mártebesi berilmegen.
Ár jyldary bul jerde túrli qalalyq qyzmetter ornalasqan. Alaıda 2022 jyldan beri ǵımarattyń tehnıkalyq jaǵdaıy nasharlap, is júzinde paıdalanylmaı kelgen.
– 2025 jyly júrgizilgen tehnıkalyq tekserý qorytyndysy boıynsha nysan apatty dep tanylyp, onyń qalpyna keltirýge jaramsyz ekeni anyqtaldy. Osyǵan baılanysty ǵımaratty buzý týraly sheshim qabyldandy, - dep habarlady qala ákimdigi.
Qazir buzý jumystary aıaqtalýǵa jaqyn. Bosatylǵan jer telimi memlekettik jer qoryna berilgen.
Eske salaıyq, buǵan deıin Almatyda 1938 jyly salynǵan perzenthana ǵımaraty tolyqtaı buzylǵan edi.
Qala ákimdiginiń málimetinshe, ǵımaratqa júrgizilgen tehnıkalyq tekserý nátıjesinde tirek qurylymdary men ınjenerlik jelileriniń 100 paıyz tozǵany anyqtalǵan. Órt qaýipsizdigi, jeldetý, gıdrooqshaýlaý júıeleri qazirgi zaman talaptaryna saı kelmegen, sondaı-aq naýqastardy tasymaldaýǵa arnalǵan jedel saty bolmaǵan.
